Əhaliyə dollar satışı 60 dəfə azalıb - Mərkəzi Bank

Azərbaycanda fəaliyyət göstərən kommersiya bankları tərəfindən 2016-cı ilin dekabr ayında nağd xarici valyuta ilə mübadilə əməliyyatları çərçivəsində əhaliyə 20,36 mln. ABŞ dollarının xalis satışı həyata keçirilib. Noyabr ayı ilə müqayisədə xalis dollar satışı 2,4 dəfə azalıb.

Teleqraf.com Mərkəzi Banka (AMB) istinadla xəbər verir ki, ümumiyyətlə, 2016-cı ildə kommersiya banklarının əhaliyə xalis dollar satışı 445,44 mln. dollar olub. Əvvəlki ilin dekabrında isə bankların əhaliyə xalis dollar satışı 1 208,238 mln. dollar olub.

Bununla da əhaliyə xalis dollar satışı illik müqayisədə 60 dəfə azalıb.

Qeyd edək ki, 2014-cü ilin ikinci yarısında başlayan qlobal iqtisadi böhran Azərbaycan Mərkəzi Bankının valyuta ehtiyatlarının həmin ilin iyul ayındakı tarixi maksimal səviyyədən (15 193,4 mln. dollar) 2017-ci il yanvarın 1-nə 11 219 mln. dollar və ya 73,8% azalaraq 3 974,4 mln. dollara enməsinə səbəb olub.