“Bu proqram ölkədə yaddaqalan iz buraxacaq” – Deputat

“Cənab Prezidentin sədrliyi ilə yanvarın 29-da “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfrans keçirildi. Dövlət başçısı həm giriş, həm də yekun nitqində əldə edilən nailiyyətlər və gələcəkdə görülməsi planlaşdırılan işlərlə bağlı öz fikirlərini bildirdi. Biz bir daha əmin olduq ki, 3 dövlət proqramının icrası nəticəsində ölkədə çox mühüm, nəhəng işlər görülüb”.

Bunu Teleqraf.com-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov deyib.

O qeyd edib ki, makroiqtisadi göstəricilər də bunu təsdiq etməkdədir:

“Son 15 il ərzində, yəni 2004-cü ildən indiyədək həyata keçirilən 3 beşillik proqram çərçivəsində ölkə iqtisadiyyatı 3,3 dəfə, valyuta ehtiyatlarımız 24 dəfə artıb. Əhalinin əməkhaqları 7, pensiyalar 9 dəfə artıb. Son 15 ildə 3200-dən çox məktəb əsaslı təmir edilib və ya yenidən tikilib. 640 tibb müəssisəsi tikilib və yenidən qurulub. Bölgələrdə 44 olimpiya mərkəzləri inşa edilib. Bütövlükdə biz görürük ki, bütün sahələr üzrə böyük nailiyyətlər əldə olunub. Bu illər ərzində ölkə iqtisadiyyatına 250 milyard dollar investiya qoyulub”.

A.Hüseynov bildirib ki, bu işlərin gələcəkdə də davam etdirilməsi üçün çox böyük zəmin var:

“Böyük iqtisadi islahatlar həyata keçirilib. Qanunvericilik bazası təkmilləşdirilib. Mükəmməl qanunlar hazırlanıb. İnanıram ki, cənab Prezidentin müəyyənləşdirdiyi strategiyaya uyğun olaraq hazırlanan dördüncü dövlət proqramı da böyük nailiyyətlərlə yadda qalacaq, ölkə iqtisadiyyatında yaddaqalan iz buraxacaq”.