İnflyasiya artdıqca böyük gəlirlər əldə edən qida şirkətləri qlobal bərabərsizliyi azaltmaq üçün ödədikləri əlavə gəlir vergiləri artırmalıdırlar.
Teleqraf.com xəbər verir ki, bunu Britaniyanın beynəlxalq humanitar təşkilatı “Oxfam” açıqlayıb.
Təşkilatın hesabatına görə, dünya iqlim dəyişikliyi, yaşayış dəyərinin artması, Rusiya-Ukrayna müharibəsi və COVID-19 epidemiyası da daxil olmaqla eyni vaxtda böhranlarla əhatə olunub, lakin ultra varlılar getdikcə zənginləşib və şirkətlərin gəlirləri sürətlə artıb.
Hesabata əsasən, son iki ildə dünyanın ən zəngin 1 faizlik kəsimi qalan 99 faizindən iki dəfə çox sərvət qazanıb.
Milyarderlərin ümumi sərvəti 2020-ci ildən bəri gündə 2,7 milyard dollar artıb, ən azı 1,7 milyard işçi isə inflyasiyanın maaş artımını üstələdiyi ölkələrdə yaşayır.
Bu problemlərlə mübarizə aparmağı hədəfləyən “Oxfam” siniflər arasında bərabərsizliyi azaltmaq üçün zənginlərə daha çox vergi tətbiq etməyi tövsiyə edir.
Məlumata görə, zəngin şirkətlər daha böyük qiymət artımları üçün Rusiya-Ukrayna müharibəsini bəhanə olaraq istifadə edir. Qida və enerji sahələrində rəqabətin olmaması da qiymətlərin yüksək saxlanmasına səbəb olur.
“Oxfam”ın icraçı direktoru Qabriela Buşer bildirib ki, milyarderlərin sayı artır və onlar daha da varlanır: “Böyük qida və enerji şirkətləri həddən artıq qazanc əldə edirlər. Böhrandan mənfəətpərəstliyə son qoymaq üçün təkcə enerji şirkətlərinə deyil, qida şirkətlərinə də əlavə gəlir vergisi tətbiq edilməsinə çağırırıq”.
Hesabatda “Tesla”nın milyarder CEO-su İlon Maskın 2014-cü ildən 2018-ci ilə qədər faktiki vergi dərəcəsinin 3 faizdən bir qədər çox olduğuna diqqət çəkilib.
Keçən il Rusiya-Ukrayna müharibəsi neft və qaz qiymətlərinin artmasına səbəb olduqdan sonra bəzi hökumətlər gözlənilməz gəlirlərinə görə qalıq yanacaq şirkətlərinə vergi tətbiq etməyə başladılar.
Bu məsələ ilə bağlı tədbir görən Portuqaliya həm enerji şirkətlərinə, həm də supermarket və hipermarket şəbəkələri də daxil olmaqla ərzaq pərakəndə satış şirkətlərinə əlavə gəlir vergisi tətbiq edib. Yanvarın əvvəlində qüvvəyə minən tətbiq 2023-cü il ərzində etibarlı olacaq.