1 Sentyabr 2023 13:46
1 082
12 Punto 14 Punto 16 Punto 18 Punto

“Çin istisna olmaqla, dünya 2024-cü ilin iyunundan növbəti məhsul mövsümünə cəmi 2 aylıq buğda ehtiyatı ilə girəcək”.

Teleqraf.com xəbər verir ki, bunu Beynəlxalq Un Sənayeçiləri və Taxıllar Assosiasiyasının (IAOM) Avrasiya regional rəhbəri Eren Günhan Ulusoy deyib.

IAOM-un Avrasiya Konfransı və Sərgisinin açılışında çıxış edən Ulusoy Avrasiya regionunda sənayenin maraqlı tərəfi kimi taxıl dəhlizinin yenidən açılmasını dəstəklədiklərini bildirib:

“Ukraynada istehsal olunan məhsulların dünya bazarlarına çatdırılması dünyanın tələb-təklif balansı üçün kritik əhəmiyyət kəsb edir. Ona görə də dünyanın gözü taxıl dəhlizi ilə bağlı gələcək xəbərlərə dikilib. Rusiya, Türkiyə, Ukrayna və BMT nümayəndələri tərəfindən 2022-ci il iyulun 22-də imzalanan “Taxıl sazişi” bu il iyulun 17-dən yenidən qüvvədən düşsə də, biz Avrasiya regionunda maraqlı tərəf olaraq dəhlizin yenidən açılmasını dəstəkləyirik. Tədarük zəncirinin davamlılığını təmin etmək üçün sənayeyə hərtərəfli dəstək veririk.

Dünyada 1,3 milyard ton qida israf edilir, buna görə də sıfır tullantıya dəstəyik. Ümid edirik ki, qlobal ərzaq təminatı təhlükəsizliyinin təmin edilməsi baxımından əhəmiyyətli olan bu razılaşma Türkiyənin səyləri ilə davam edəcək. Çin istisna olmaqla, dünya 2024-cü ilin iyunundan növbəti məhsul mövsümünə cəmi 2 aylıq istehlaka bəs edəcək buğda ilə girəcək”.

Günhan Ulusoy qeyd edib ki, 2022-ci ili 3 milyon 400 min ton un ixracı, 2023-cü ili 3 milyon 500 min ton ixracla bağlamağa hazırlaşan Türkiyə 9 ildir un ixracatında dünya lideridir: “Dünya buğda ehtiyatından istifadə nisbəti 2016/17 mövsümündən bəri 34% təşkil edib. Üstəlik, dünyadakı 265 milyon ton buğda ehtiyatının yarısından çoxu, 135 milyon tonu Çinin əlindədir. Səhmlərdən istifadə nisbəti tarixdə ilk dəfə olaraq 17 faizə enir”.

Qeyd edək ki, konqresə Mərkəzi və Şərqi Avropa, Baltikyanı ölkələr, Rusiya, Ukrayna, Qazaxıstan, Türkiyə və digər Orta Asiya respublikalarından minə yaxın iştirakçı qatılıb.


Müəllif: Yeganə Oqtayqızı