Avropa İttifaqı hədəflərini açıqladı: Bundan sonra icazə...

Avropa İttifaqı (Aİ) üzv ölkələrin bərpa olunan enerji tənzimləməsinin yenilənməsini təsdiqləyib.

Teleqraf.com xəbər verir ki, 2030-cu ilə qədər külək və günəş kimi müxtəlif bərpa olunan mənbələrin Aİ-nin ümumi enerji istehlakında payı 42,5 faizə yüksələcək.

Sənaye bərpa olunan enerjidən istifadəni hər il 1,6 faiz artırmalı olacaq.

Nəqliyyat sektorunda təmiz yanacağın payı artırılacaq və tullantılar azalacaq.

Binalarda bərpa olunan enerjinin payının 2030-cu ildə ən azı 49 faiz olması hədəflənəcək. Bərpa olunan enerji layihələri üçün icazə prosedurları sürətləndiriləcək.

Bu tənzimləmədən əvvəl Aİ-nin bərpa olunan enerji hədəfi 2030-cu il üçün 32 faiz olaraq təyin edilmişdi. Son vaxtlar Aİ ölkələrinin ümumi enerji istehlakında bərpa olunan mənbələrin payı 22 faiz civarındadır.

Bu tənzimləmə Avropa Yaşıl Sazişində iqlim hədəflərinə cavab vermək və Rusiyadan enerji asılılığını azaltmaq üçün hazırlanıb.