Ərgənç əsəbiləşdi: “Həyat yoldaşımdı, oğlumun anasıdır...”

2009-cu ildə aktrisa Bərgüzar Korellə nikaha girən Xalid Ərgənc evlilikləri ilə bağlı tənqidlərə cavab verib.

Teleqraf.com Türkiyə mediasına istinadla xəbər verir ki, aktyor İnstaqramda Bərgüzar Korellə fotosunu paylaşıb və fikirlərini yazıb: “İllər əvvəl sevgi münasibətimiz başlayanda hər kəs ağzının suyunu axıdaraq üstümüzə düşən vaxtlarda nələr çəkdiyimizi bir müsahibəmdə danışmışam.

Adam olan kəs sözü bir dəfə deməklə anlayar. Amma bu qədər illər sonra hələ də bəzi yerlərdə xüsusən Bərgüzar haqqında bəzi çirkin fikirlər səslənirsə, demək, mən vəziyyətimizi yaxşı izah edə bilməmişəm”.

Aktyor bildirib ki, ilk ailə münasibətinin bitməsinin Bərgüzar Korellə heç bir əlaqəsi yoxdur: “Xanımlar və bəylər, yenə deyirəm - ilk ailə həyatıma son qoymağımın Bərgüzarla zərrə qədər də əlaqəsi yoxdur. Rəsmən və qarşılıqlı anlaşma ilə bitən evlilikdən bir müddət sonra belə çətinliklər olacağını bilə-bilə, sevgi ilə başlayan bir münasibətdir bizimki.

“Mış, miş” və “eşitdik ki” kimi ifadələrlə yayılmış dedi-qodulara inanmaq doğru deyil. Dedi-qodusunu etdiyiniz qarşı tərəfə – onların hazırda ailələri və övladları var – bir az hörmət göstərin, lütfən”.

Xalid Ərgənc qeyd edib ki, Bərgüzar Korel onun 8 illik həyat yoldaşıdır: “Oğlum Əlinin anasıdır, hər zaman sevdiyim və ən qiymətlimdir. Haqqımızda yazılanları qınayıram".

Qeyd edək ki, Bərgüzar Korel-Xalid Ərgənc cütlüynün sevgisi “Min bir gecə” serialı ilə başlayıb, daha sonra onlar ailə qurublar.

Mediada Xalid Ərgəncin əvvəlki arvadından boşanmasına Bərgüzar Korelin səbəb olduğu iddiası gündəmə gəlib.