Rusiyada kritik gəlişmə: “Bu, Azərbaycan üçün də təhlükəlidir”

Quru sərhədlərinin bağlı qalması Şimali Qafqazdan mümkün təhlükənin neytrallaşdırılmasına imkan verir.

Teleqraf.com xəbər verir ki, bunu politoloq Elxan Şahinoğlu deyib.

Ekspert Rusiyanın Azərbaycanla həmsərhəd bölgələrində baş verən son gəlişmələrə diqqət çəkib:

“Şimali Qafqaz qaynayır. Son iki ayın statisktikası Rusiya hakimiyyəti üçün həyəcan siqnalına səbəb olmalıdır. Martın 2-də Milli Antiterror Komitəsi Qarabulaq şəhərində (İnquşetiya) keçirilən əməliyyat nəticəsində 6 silahlının öldürüldüyünü açıqlayıb. Respublikada “antiterror əməliyyatı rejimi” elan edilib. Martın 22-də İnquşetiyada İŞİD terror təşkilatına bağlı 30-a yaxın şəxsin saxlanıldığı bildirilib.

Martın 31-də Mahaçqala və Kaspiysk (Dağıstan) şəhərlərində “antiterror əməliyyatı rejimi” tətbiq edilib. Federal Təhlükəsizlik Xidməti silahlı qruplaşma üzvlərini çoxmərtəbəli binaların bir neçə mənzilində mühasirəyə alıb. Aprelin 11-də Nalçikdə (Kabardin-Balkar) “xüsusi əməliyyat” zamanı iki yerli sakin öldürülüb. Aprelin 22-də Karaçayevskdə polis əməkdaşlarına hücum olub. Rusiya Daxili İşlər Nazirliyinin 2 əməkdaşı həlak olub, 1-i ağır yaralanıb.

Bu statistika Birinci və İkinci Çeçenistan müharibələri dövrünü xatırladır. Rusiya Ukraynada müharibə aparakən, Şimali Qafqaza nəzarət zəifləyib, bundan da yerli silahlı və radikal qruplar istifadə etməyə çalışırlar. Əslində Moskva üçün həyəcan təbili ötən ilin oktyabrında çalınmışdı. Maxaçqalada qəzəbli kütlə hava limanı binasına daxil olaraq, İsrail vətəndaşlarını axtarmışdılar. Federal Hava Nəqliyyatı Agentliyi aeroportdan uçuşları və enişləri dayandırmışdı. Kreml bu məsələnin üstünü örtməyə çalışdı. Halbuki narazı kütlənin qarşısına İsrail vətəndaşları çıxsaydı, nəticə ağır olacaqdı.

Maxaçqala gəncləri İsrailin Qəzza bölgəsindəki hərbi əməliyyatına etirazı hava limanında “yəhudi ovu”yla cavab vermişdi. Bu, faktiki anti-semit aksiya idi. Bu o deməkdir ki, Şimali Qafqazın Rusiyanın mərkəzi hakimiyyətinə qarşı müqavimət gücü hər an yenidən özünü göstərə bilər. Şimali Qafqazda radikalizmin artışı Azərbaycan üçün müəyyən təhlükələr yarada bilər. Quru sərhədlərinin bağlı qalması hələlik bu təhlükənin neytrallaşdırılmasına imkan verir”.