Tünzalə TV-ləri, Tahir İmanov isə Afət Fərmanqızını təndiq etdi - Şok sözlər

Xalq artisti Tünzalə Ağayeva "Planet Parni iz Baku" komandasının İnstaqramda yayımlanan 2+1=4 adlı layihəsində qonaq olub.

Teleqraf.com xəbər verir ki, Tünzalə Ağayeva əməkdar artist Tahir İmanovun "Bayağı müğənniləri, dırnaqarası müğənniləri görəndə yəqin ki, dəhşətə gəlirsiniz" sualına belə cavab verib: "Bu cahilliyin qarşısını ala bilməyəcəyik. Vaxt var idi, elə bilirdim ki, bu cərəyanın qarşısını almaq olar. Amma insanların zövqü, hara meyilli olması onu göstərdi ki, bunu düzəltmək çətindir. Bir dəfə Murad Dadaşov dedi ki, ən pis musiqinin belə dinləyicisi var. Burada tamaşaçının şəxsi zövqü böyük rol oynayır.

Bizi cəmiyyət, mediya, ailə necə yetişdirirsə, elə də davam edir. İnternet bu gün həyatımıza girib. Bu şou-biznesə, müğənnilərin keyfiyyətinə təsir edir. Amma baxış sayı ilə real insan zövqü eyni ola bilməz. Mən evdə oturub, on kompüteri idarə edə və on baxış sayı əldə edə bilərəm. Sizə texnologiya ilə yanlış statistika verə bilərəm. Bu texnologiyanın bizi aldatdığı bir tərəfidir".

Müğənni televiziyaları bayağı musiqini təbliğ etməkdə günahlandırıb: "Görək, televiziyada çalışan insanları, prodüser və rəhbərləri nə maraqlandırır. Yalnız pul rol oynayanda fəlakət baş verir. Bunu hər kəsə şamil etmirəm. Biri var, sən sosial şəbəkədən istifadə edirsən və orada heç kim sənə qadağa qoya bilməz. Amma internet azadlıq deyil, mən ağıllı bir istifadəçi kimi internetin yaxşı tərəflərindən istifadə edirəm.

Mən televiziyaya çıxanda da özümə zidd hərəkətə yol vermərəm. Şükür Allaha, düşünüdürücü söhbət aparırıq. Hər kəs elə düşünür ki, əlimdə telefon varsa, nə istəyirəm, onu edirəm. Reytinq anlayışını hər kəs fərqli başa düşür. Biz gəncliyi qoruya bilmirik"

Tahir İmanov Tünzalə Ağayevanın sözlərinə dəstək olaraq müğənni Afət Fərmanqızının ünvanın təndiqi sözlər işlədib:

"Estradamızda bir çox insanlar susurlar. Bir müğənni çıxmışdı, oxuyurdu: "Məndə sığar iki cahan..." Bilmirəm, o müğənnidir, nədir...Bir nəfər çıxıb deyərdi ki, bu, Azərbaycan musiqisinə zərbədir. Bu cür dırnaqarası müğənniləri efirə çıxarmaq olmaz. Hamı susdu".

Qeyd edək ki, Afət Fərmanqızı İmadəddin Nəsiminin “Məndə sığar iki cahan, mən bu cahana sığmazam” qəzəlinə hindsayağı mahnı ifa etməsi ilə gündəmə gəlmişdi.