Ağadadaş Ağayev: "Tətillərimi ailəmlə birlikdə Şuşada keçirmək istəyirəm" - Müsahibə

Xalq aristi Ağadadaş Ağayev Teleqraf.com-a müsahibə verib.

(Əvvəli burada)

Müsahibənin ikinci hissəsini təqdim edirik:

- Ağadadaş müəllim, Cəlilabad rayonunda doğulmusuz. Bakıya gəlişiniz necə oldu?

- Yeddinci sinifdə oxuyurdum, həmişə oxumağa gizli yer axtarırdım. Çox utancaq idim. Məktəbdən hamı gedəndən sonra qapıları bağlayıb oxuyurdum ki, eşidən olmasın. Bir dəfə məktəbdə "Sona bülbüllər" mahnısını oxuyanda riyaziyyat müəllimim təsadüfən eşitdi və otağa daxil oldu. Onun musiqi duyumu güclü idi. Ondan sonra Sərdar müəllim məni musiqiyə yönləndirdi. Mənim bu sahəyə gəlişim yeddinci sinifdən başladı.

Asəf Zeynallı adına Musiqi kollecinə daxil olmaq üçün gələndə gecikmişdim, sonra Pedaqoji Universitetin Fizika və texnologiya fakültəsinə daxil oldum. Musiqini çox sevirdim. İlk kasetim 1981-ci ildə işıq üzü gördü və və beş il sonra efirə çıxdım.

- Azərbaycan dövlət televiziyasında altı il aparıcılıq etmisiniz. Amma son illərdə AzTV-ə çıxmırsınız. Buna səbəb nədir?

- AzTV mənim həyatımın böyük bir dəyəridir. Bu televiziyanı çox sevirəm, çünki dövlətimin kanalıdır. Professor Nizami Xudiyev AzTV-də sədr olan zaman proqramım yayımlanırdı. Əslində, mənim insanların arasında bölgü aparmaq, şəxsiyyətləri qarşı-qarşıya qoymaq kimi xarakterim yoxdur. Bundan söhbəti gedə bilməz. Amma haqsızlıq görəndə orada durmuram, başım nə bəlaya düşərsə, düşsün.

Arif Alışanov AzTV-də sədr oldu və bir gün məni çağırdı ki, verilişinin saatını artıraq, tələbat çoxdur. Dedim, Arif müəllim, necə istəyirsiniz... Sonra başladı ki, dostun da getdi... Ona dedim ki, sözünüzü yiyəsinin üzünə deyin, mənim yanımda danışmayın. Ondan sonra verilişi dayandırdım. O gün-bu gün, AzTV kanalına çıxmıram.

Amma artıq Arif Alışanov yoxdur. Əslində, o dövrdə də dövlət tədbirlərinə qatılırdım. Tədbiri AzTV çəkir deyə getməmək kimi hal olmayıb. Amma Arif Alışanov sədr olan dövrdə AzTV-nin qapısından içəri girmirdim, heç kim də məni oraya apara bilmədi. Bu dəqiqə qapılar açıqdır, çoxlu zəng edirlər.

- Hər halda telekanallara çıxmırsınız. Buna səbəb nədir?

- Düzdür, televiziyalara çox çıxmıram. Amma bir neçə verilişə çəkilmişəm, yaxın günlərdə təqdim ediləcək. Hazırda ölkəmizdə bayramdır. Eləcə də bəzi verilişlər yavaş-yavaş səviyyəsini qaldırır. Mən təklif alanda verilişin səviyyəsinə, mövzusuna baxıram. Xalqa heç bir faydası olmayan verilişlər var, orada iştirak etməyəndə daha rahat oluram.

- Xəzər Televiziyasına xalq artisti Murad Dadaşov rəhbər təyin edildi. Ümumiyyətlə, bir neçə kanallarımızda vəziyyət düzəlir...

- Bəli, görürsünüz, fərqi hiss edirsiniz. Murad Dadaşova hörmətim böyükdür və inanıram ki, o, telekanalın reytinqini artıracaq.

- İTV kanalından aparıcılıq təklif edilsə, qəbul edərsinizmi?

- Bəli, İctimai televiziyadan təklif gəlsə, dəyərləndirərəm. Çünki o televiziyanı da çox sevirəm. O kanalda Azərbaycan millətinə hörmət, dəyərlərimizə diqqət var. Şou orada ən axırıncı plandadır. Şou da miqyasında olmalıdır. Bəzi verilişlərə baxırsan, qonaq sanki çayxanada oturub danışır.

Onu da deyim ki, bəzi müğənnilərimiz dahilərimiz haqqında mahnı oxuyurlar. Baxırsan ki, bu müğənnini heç kim tanımır. Sənin nə həddin var, bu mahnını oxuyursan?! Axı sənin səsin bu mahnıya uyğun deyil. İkincisi, şəxsiyyətlər haqqında mahnı oxuyan müğənninin də şəxsiyyəti olmalıdır. Belə mahnını səs tembrı, mahnıya münasibəti, xarakteri və obrazı yaşaya və anlaya bilən oxumalıdır. Hər yerindən duran hərbi geyim geyinir və oxuyur. Belə olmaz.

Keçmişdə bu tip mahnıları ancaq bariton səsə sahib olanlar oxuyardı. Bu gün o balans pozulub. İnşallah, bu qələbədən sonra həyatımızın bütün sahələrində tərəqqi olacaq. Azərbaycanı böyük inkişaf gözləyir.

- Eşitdik, Şuşada tarixi muzey açacaqsınız.

- Xeyr, mənim belə bir ideyam yoxdur. Amma böyük çıxmasın, tarixi muzey açılsa, çox sevdiyim antik əşyalarımı oraya təqdim edəcəm. Mənim çoxlu antik əşyalarım var. Məsələn, düyü dəyirmanım var, 250 yaşı olan küpüm var. Kolleksiya yığıram. Regionlarımıza gedərkən antik əşyaları gördümsə, gətirirəm. Muzey olsa, ən çox sevdiyim antik əşyalarımı təqdim etməyə hazıram.

- Dağlıq Qarabağda ev almaq, obyekt açmaq fikriniz varmı?

- Obyekt açmaq yox, amma yay tətillərimi ailəmlə birlikdə Şuşada keçirmək istəyirəm.

- Sonuncu dəfə Qarabağda nə zaman olmusunuz?

- Mən daim cəbhəyanı ərazilərdə olmuşam, konsertlər vermişəm. İki il əvvəl Horadizə getdim və orada 200-dən uşağa kiçik toy etdim. Sonra da konsert verdim. Eləcə də bütün hərbi hissələrdə konsert vermişəm.

- Müəllim kimi fəaliyyət göstərmisinizmi?

- Doğulduğum Hasıllı kəndində yeddi il müəllim işlədim. Vaxtıilə məktəbdə məni küncdə saxlayan müəllimlərimlə birlikdə jurnal götürüb sinfə daxil olurdum (gülür).

- Ali məktəbi bitirən kimi rayona getdiniz?

- Mən hərbi xidmətə getmədim, o vaxt sovet hökuməti idi. Adətən, azərbaycanlıları Sibirə göndərirdilər, ora getsəydim, səsim batardı. Müəllim işləməyimin də səbəbi bu idi. 27 yaşa qədər kənddə müəllim işləyəni əsgərliyə aparmırdılar. 27 yaşım tamam olan kimi Filarmoniyaya solist gətirdilər. Çox təzadlı həyatım olub. Sonra Mədəniyyət və İncəsənət Universitetini bitirdim.

- Ustadınız olubmu?

- Mənə xüsusi dərs deyən müəllimim olmayıb. Amma Sabir Mirzəyevi özümə müəllim bilmişəm. Gənclik illərimdə onun oxuduğu Çahargahı eynilə təqlid edirdim. Sonra gördüm ki, bəhrələnmək olar, təqlid etmək yox. Kişi odur ki, şöhrəti və pulu daşıya bilsin, baş gicəllənməsi olmasın. Bilmirəm bu günə qədər bunun öhdəsindən gəlmişəm, ya yox. Amma deyilənə görə vəziyyət pis deyil...

- Ağadadaş Ağayev deyəndə imkanlı müğənni kimi yada düşürsünüz. Obyektiniz də var...

- Allaha qurban olum, heç vaxt sıxıntı yaşamamışam. Allahım ruzimi verir. Mənə elə gəlir, Allah da bilir ki, mən onu dəhşətli dərəcədə sevirəm. Allaha çox bağlı insanam. Həyatımda ağır günlərimdə belə Allahıma naşükürlük etməmişəm. Çox ağır günlər, imtahanlar yaşamışam. Həyatımın ən ağır günləri 1999-cu ildə başladı, 2016-cı ilə qədər davam etdi.

- Hansı çətin günlərdən, imtahanlardan keçdiniz ki?..

- Övladım və ailəmizdə xəstələr oldu. Övladımı bütün dünyada gəzdirdim, 12 dəfə əməliyyat olundu. Hər əməliyyatda ölüb yenidən dirilmişəm. Aylarla Almaniyada qalırdım. Qızım bir gecədə səkkiz-on dəfə özündən gedirdi. Həmişə deyirdim ki, Allahım, qızım yeriməsin, amma özündən getməsin. Rəbbim onu da mükafatlandırdı. Dərmanını tapa bilmirdik, şükür Allaha, indi tapılır.

Bu gün danışır, mənimlə istədiyi vaxt mahnı oxuyur. Hər ağır günün daha ağırları var. Qızımı Türkiyədə xəstəxanaya aparanda görürdüm ki, daha ağır xəstələr var. Hər zaman şükür edə-edə yaşamışam. İnsanları çox sevirəm. Ümumiyyətlə, insanlara kömək etməyi sevirəm...

- Oğlanlarınızla birlikdə yaşayırsınız?

- Xeyr, Allaha şükür, oğlanlarımın hamısı ayrı yaşayır. Hər birinin evi, balaları var. Üçü evli, biri subaydır. Allah hər ataya belə övladlar nəsib etsin! Hamısı dövlət məmurudur. Oğlumun ikisi Fövqəladə Hallar Nazirliyində, biri hərbçi, biri isə Asan Xidmətdə çalışır.

- Adınızı daşıyan nəvəniz varmı?

- Bəli, kiçik Ağadadaşım da var. Mənim ona yazığım gəlir (gülümsəyir). Eyni ilə mənim uşaqlığımdır. Deyirəm ki, bizim nəsildə mənim yaşadıqlarımı buna yaşadacaqlar. Çünki eynilə mənim xasiyyətimdir.

- Kiçik Ağadadaşın sənətinizi davam etdirməsini istəyərsinizmi?

- Bir oğlumu dörd-beş il hazırladım, mənimlə toy mərasimlərinə də gedirdi. Hazırda Fövqəladə Hallar Nazirliyinin əməkdaşdır. İşin içinə girdi və dedi ki, mən burada qala bilmərəm. Hamısının yaxşı səsi var, amma keçdiyim yollara baxıram və əziyyət çəkmələrinə dözə bilmirəm. Bizim sənətimiz çox ağır sahədir.

- Pandemiya dövrünü necə keçirirsiniz?

- Şükür Allaha, hər şey qaydasındadır, ailəmizdə, nəslimizdə salamatçılıqdır. Onsuz da ömrü boyu karantində yaşayan adamam. Bütün qaydalara riayət edirik.

Foto: Ceyhun Rəhimov