Bəhram Bağırzadədən Hidayət Heydərova jest

Əməkdar artist Bəhram Bağırzadə Hidayət Heydərovun Paris-2024 Yay Olimpiya Oyunlarında qızıl medal qazanması ilə bağlı kitab nəşr etdirəcək.

Teleqraf.com xəbər verir ki, bu haqda o, İnstaqramda məlumat verib: "Parisdə keçirilən Yay Olimpiya Oyunlarında Azərbaycan cüdoçusu Hidayət Heydərovun qələbəsi yaradıcı kollektivimizi o qədər ruhlandırdı ki, "Cüdonun tarixi. Uşaqlar üçün" kitabını nəşr etmək və cüdomuzun möhtəşəm qələbəsinə ithaf etmək qərarına gəldik.

Bu kitab sayəsində balaca oxucularımız cüdonun tarixi, bu idman növünün necə və nə vaxt yarandığı, cüdoçuların ənənəvi geyimləri haqqında bir çox məlumatlarla tanış olacaqlar. Əminəm ki, qələbə gənclərimiz, uşaqlarımız üçün yaxşı motivasiya olacaq və yaxın gələcəkdə baş tutan çempionatlarda, olimpiadalarda Hidayət Heydərovun qələbəsindən ruhlanmış çoxlu yeni idmançılar meydana çıxacaq ".