10 İyul 2017 14:02
724

Bu gün Bakı Dövlət Universitetinin (BDU) Jurnalistika fakültəsində "Jurnalistika: Dünyanın aparıcı informasiya agentlikləri; Azərbaycanda informasiya agentliklərinin təşəkkülü və inkişaf perspektivləri; Beynəlxalq jurnalist hərəkatı" dərs vəsaitinin təqdimat mərasimi keçrilib.

Teleqraf.com xəbər verir ki, tədbirdə BDU-nun professor-müəllim heyəti, mətbuat orqanlarının rəhbərləri və digər şəxslər iştirak edib.

Tədbirdə çıxış edən BDU Jurnalistika fakültəsinin dekanı Vüqar Əliyev bildirib ki, dərs vəsaitində həm dünya, həm yerli xəbər agentlikləri, həm də bu informasiya resurslarını birləşdirən beynəlxalq jurnalist təşkilatları, onların yaranması, fəaliyyəti və müasir dövründən bəhs edilir: "Kitab 3 hissədən ibarətdir. İlk bölmədə dünyanın xəbər axınını təmin edən əsas informasiya agentlikləri ətraflı şəkildə araşdırılır.

İkinci bölmədə Azərbaycanın ilk xəbər agentliyi olan "Azərtac"dan başlayaraq çağdaş dövrün bütün agentlikləri - "Turan", "Trend", "Olaylar", "Gündəlik Teleqraf" MMC, "Report", "Modern.az" və digər xəbər portalları, üçüncü bölmədə isə beynəlxalq jurnalist təşkilatları tədqiqata cəlb olunur".

Jurnalistika nəzəriyyəsi və təcrübəsi kafedrasının müdiri Cahangir Məmmədli universitetlərin, jurnalistika fakültələrinin tələbələri, müəllimlər, peşəkar jurnalistlər, media sahəsi üzrə araşdırma aparan mütəxəssislər üçün nəzərdə tutulan dərs vəsaitinin əhəmiyyətindən danışıb.

"Report" İnformasiya Agentliyinin baş redaktoru Murad Əliyev kitabın onlayn versiyasının təqdim edilməsini təklif edib: "Kitabın davamı gəlməlidir. Jurnalistika statik deyil, dinamik sahədir. Bu kitabın onlayn versiyasının yaradılması daha yaxşı olardı. Onlayn versiya tələbələrin kitabdan istifadə etməsi üçün daha geniş imkan yaradar".

Tədbirdə digər media qrumlarının rəhbərləri də çıxış edib.

Qeyd edək ki, kitabın müəllifləri Beynəlxalq jurnalistika kafedrasının müdiri, professor Həmid Vəliyev, kafedranın müəllimləri Pərvanə İbrahimova və Vəfa İsgəndərovadır.

Foto: Elçin Murad


Müəllif: İlhamə