1 Dekabr 2017 16:17
673
12 Punto 14 Punto 16 Punto 18 Punto

Milli Məclis 2018-ci il üçün dövlət büdcəsi layihəsini təsdiq edib.

Teleqraf.com xəbər verir ki, spiker Oqtay Əsədov layihəyə təklif edilən dəyişikliklərə baxmaq üçün hökümətə verilən vaxtın sona çatdığını və artıq hökumət üzvlərinin bu təklifləri dəyərləndirdiyini bildirib.

Daha sonra iclasda çıxış edən Maliyyə naziri Samir Şərifov deyib ki, “Azərbaycan Respublikasının 2018-ci il dövlət büdcəsi haqqında” qanun layihəsinin Milli Məclisin komitə və plenar iclaslarında müzakirəsi zamanı deputatlar tərəfindən səsləndirilən təklif və tövsiyələr hökumət tərəfindən ətraflı təhlil edilib.

Nazir bildirib ki, müzakirələr və Prezidentin təklifləri əsasında layihədə bəzi dəyişikliklər edilib: “Ehtiyac meyarı haqqında qanuna düzəliş edilib. Düzəlişə əsasən, ehtiyac meyarının həddi 14 manat artırılaraq 130 manata çatdırılıb. Xərclər parametrləri üzrə də bir sıra dəyişikliklər edilib”.

Nazir deyib ki, Milli Məclisə büdcə müzakirələri zamanı qaldırılan məsələlər prezidentə məruzə olunub: “Prezidentin tapşırığı ilə eşitmə və ürək qüsuru ilə doğulan uşaqların müalicəsi və əməliyyatı üçün büdcədən 4 milyon manat vəsait ayrılacaq. Növbəti ildən həmin xəstələrin müalicəsinə başlanacaq. Bununla əlaqədar Səhiyyə və Maliyyə nazirlikləri arasında ayrıca müzakirə də aparılacaq”.

Samir Şərifov qeyd edib ki, 2018-ci ilin dövlət büdcəsindən siyasi partiyalara 3.1 milyon, QHT-lərə Dövlət Dəstəyi Şurasına 5.6 milyon manat ayrılacaq: “Milli Məclisin xərcləri üçün əlavə 1 milyon 200 min manat ayrılması nəzərdə tutulub. Bu məbləğ Milli Məclisin mətbəə, avadanlıq və digər xərcləri üçün tam maliyyə təminatı yaradacaq”.

Nazir əlavə edib ki, bir sıra təşkilatlara da əlavə maliyyə ayrılması nəzərdə tutulub: “Üzeyri Hacıbəyli adına simfonik orkestrin əməkdaşlarının maaşlarının artırılması, habelə Bakı şəhərində sahibsiz heyvanların idarə edilməsi üçün 3.8 milyon manat vəsait ayrılması nəzərdə tutulub”.

Samir Şərifov qeyd edib ki, Təhsil Nazirliyinin xərclər bölməsindən 46 milyon manat tələbələrə yönləndiriləcək. Bununla da tələbələrə ayrılan vəsait 70 milyon manata çatdırılacaq. Bu ötən illə müqayisədə 19.3 faiz çoxdur”.


Müəllif: Cavad