“Prezidentin 20 ən böyük uğuru” - “Ağ Yol”dan yeni kampaniya

“Ağ Yol” Vətəndaş Hərəkatı “Prezidentin 20 ən böyük uğuru” adlı kampaniyaya start verib.

Teleqraf.com xəbər verir ki, bununla bağlı Hərəkat bəyanat qəbul edib.

Bəyanatda bildirilir: "Azərbaycanın müstəqilliyinin qorunması, müstəqil siyasətin davam etdirilməsi, iqtisadi yüksəliş, sosial rifah, ictimai-siyasi sabitlik və vətəndaş həmrəyliyi Azərbaycan Respublikasının Prezidenti İlham Əliyevin siyasətinin əsas məqsədləridir. Azərbaycan sabit, güclü, demokratik, hüquqi dövlətdir və bütün parametrlərə görə regionda liderdir. Böyük iyirmiliyin sammitində iştirak, nüvə təhlükəsizliyi tədbrilərində böyük dövlətlərlə birgə müzakirə tərəfdaşı, regional sabitliyin qorunmasında əsas təminatçı ölkələrdən biri, beynəlxalq terrorizmlə mübarizə üçün dünya dövlətləri ilə birgə mübarizənin təşkilatçısı olması göstərir ki, Azərbaycan dünya siyasətinin əsas və aparıcı dövlətlərindən biridir".

“Ağ Yol” Vətəndaş Hərəkatı bəyan edir ki, Azərbaycan regional inkişafın əsas dayağı olan ölkələrdən biridir: "Böyük neft-qaz layihələrindən sonra Avropa ilə Asiyanı birləşdirən Bakı-Tbilisi-Qars beynəlxalq dəmiryolu xəttinin açılışı Azərbaycanın böyük layihələrin reallaşmasında dünya üçün əvəzedilməz bir dövlət olduğunun göstəricisidir.

Bütün bu nailiyyətlərin əsası ulu öndər Heydər Əliyev tərəfindən qoyulmuş və hazırda cənab İlham Əliyev tərəfindən uğurla davam etdirlir. Prezident İlham Əliyevin ölkəyə rəhbərlik etdiyi 2003-cü ildən indiyədək Azərbaycanın şanlı tarixinə hərtərəfli və sürətli inkişaf dövrü kimi daxil olub. Artıq regionun aparıcı dövləti olan Azərbaycan beynəlxalq münasibətlər sistemində müstəqil xarici siyasət həyata keçirən etibarlı strateji tərəfdaşa çevrilib. Aparılan ictimai rəy sorğularının nəticələri göstərir ki, Azərbaycan seçicilərinin 80%-dən çoxu ölkədə davamlı sosial – iqtisadi inkişaf və modernləşmə xəttinin davam etdirilməsinin tərəfdarıdır".

Bütün bunları nəzərə alaraq, “Ağ Yol” Vətəndaş Hərəkatı, vətəndaşları Azərbaycan Respublikası Prezidenti seçkilərində ölkədə sosial dövlət quruculuğunun təminatçısı olan cənab İlham Əliyevə səs verməyə çağırır.