3 İyul 2020 12:12
5 488
12 Punto 14 Punto 16 Punto 18 Punto

AzTV-nin Kinoproqramlar və dublyaj redaksiyasının baş redaktoru, əməkdar incəsənət xadimi Etibar Kamal oğlu Babayevin koronavirusdən vəfat etməsi təsdiqlənib.

Azərbaycan Tibb Universitetinin Tədris Terapevtik Klinikasının mətbuat xidmətinin rəhbəri Günel Aslanova Teleqraf.com-a açıqlamasında Etibar Babayevin koronavirusdan dünyasını dəyişdiyini bildirib:

"Etibar Babayev xəstəxanaya yerləşdirilmədən öncə yeddi-səkkiz gün ev şəratində koronavirusdan müalicə alıb. Vəziyyəti pisləşdiyinə görə iyunun 28-də gecə saat 00:32 radələrində yüksək hərarət və boğulma əlamətləri ilə klinikaya daxil olub.

Qan təzyiqi 140/90, nəbzi 98 olub. Hər iki ağ ciyərdə "buzlu şüşə" əlaməti qeyd olunub. Təcili döş qəfəsinin rentgen şəkli çəkilib, ona ikitərəfli subtotal pnevmoniya diaqnozu qoyulub.

İyulun 1-də halı kəskin pisləşib və reanimasiya şöbəsinə yerləşdirilib, süni tənəffüs aparatına qoşulub. Kəskin tənəffüs çatışmazlığına görə iyulun 2-də gecə saat 23:10-da dünyasını dəyişib".

***

10:35

AzTV-nin Kinoproqramlar və dublyaj redaksiyasının baş redaktoru, əməkdar incəsənət xadimi Etibar Babayevin ölüm səbəbilə bağlı fərqli məlumatlar yayılır. İlkin məlumatda onun koronavirusdan vəfat etdiyi bildirilsə də, sosial şəbəkələrdə ölümün ürək tutmasından baş verdiyi iddia edilir.

Məsələ ilə bağlı Teleqraf.com-un əməkdaşı AzTV ilə əlaqə saxlayıb.

Azərbaycan Dövlət Televiziyasından saytımıza daxil olan məlumata görə, Etibar Babayevin ölüm səbəbi araşdırılır və hələlik dəqiq məlumat yoxdur.

Qeyd edək ki, Etibar Babayev ağır vəziyyətdə Tibb Universitetinin Tədris Terapevtik Klinikasına gətirilib. Həkimlərin müdaxiləsinə baxmayaraq onun həyatını xilas etmək mümkün olmayıb.


Müəllif: Rəqsanə Həsənova