Təhsil müəssisəsində azyaşlıya qarşı şiddət... - Açıqlama

İsmayıllıda məktəbəqədər təhsil müəssisəsində azyaşlıya qarşı şiddət haqlı olaraq cəmiyyətin hər bir üzvündə hiddət doğurub. Təəssüf ki, belə hallara yalnız bölgələrdə deyil, paytaxtda da tez-tez rast gəlinir. Yalnız bağça və məktəblərdə deyil, bəzən ailələrdə də azyaşlılar zorakılığa məruz qalır. Bu hadisə sosial şəbəkə vasitəsilə ictimailəşdi. Lakin istisna deyil ki, onlarla belə neqativ hallar var ki, ictimailəşmir və uşaqlar zorakılığa, kobud rəftara məruz qalmaqda davam edir.

Bunu Teleqraf.com-a Milli Məclisin Ailə, qadın və uşaq məsələləri komitəsinin üzvü Könül Nurullayeva deyib.

Deputat bildirib ki, həmin azyaşlının valideyninin sözlərinə görə, digər övladlarının da tərbiyəsi ilə sözügedən müəllim məşğul olub:

“Lakin hər hansı narazılıq olmayıb. Yəni, uşaqlar evdə bu barədə bir söz deməyib. Amma uşaqların nəsə deməməsi əvəllər də belə hadisənin baş vermədiyi anlamına gəlmir. Ümumiyyətlə, uşaqlara qarşı kobud rəftar və zorakılıq həm hüquqi, həm də mənəvi baxımdan yolverilməzdir. Xüsusilə ümumtəhsil məktəblərində və məktəbəqədər təhsil müəssisələrində qeydə alınan bu xoşagəlməz hallar hər birimizi narahat edir”.

Millət vəkili hesab edir ki, bu cür neqativ hallara hüquqi qiymət verilməlidir:

“Çünki belə hallarla bağlı qanunvericilikdə konkret məsuliyyət nəzərdə tutulur. Aidiyyatı qurumlar uşaqların olduğu müəssisələrdəki vəziyyəti diqqətdə saxlamalı, onların hüquqlarının təmin olunması istiqamətində aşkarlanan nöqsanlarla bağlı müvafiq tədbirlər görməlidir. Həmin müəssisələrdə uşaqlarla işləyən şəxslər düzgün davranmalı, azyaşlıların beynəlxalq sənədlərdə və milli qanunvericilik aktlarında təsbit olunmuş hüquqlarını müdafiə etməlidirlər. Burada həm də ictimai qınaq olmalıdır. Bu cür insanlar öz məsuliyyətlərini dərk etməlidirlər. Məktəbəqədər təhsil müəssisələrində tərbiyəçilər intensiv qaydada tibbi-psixoloji müayinədən keçməlidirlər. Çünki insanlar övladlarını bu şəxslərə etibar edir. Zorakılığa məruz qalan uşaqların həm fiziki, həm də psixoloji problemləri meydana çıxır. Övladını bağçaya, məktəbə göndərən valideyn peşmançılıq hissi yaşamamalıdır”.

Könül Nurullayevaya görə hər birimiz sağlam cəmiyyətin inkişafında iştirak etməli və prosesə töhfə verməliyik:

“Bu, həm də vicdan məsələsidir. Azyaşlıların formalaşması ailədən sonra məktəbəqədər təhsil müəssisəsindən başlayır. Bu o demıkdir ki, bu müəssisələrdə çalışan insanların məsuliyyəti daha çoxdur. Bizdə uşaq hüquqlarının qorunması ilə bağlı hüquqi baza kifayət qədər təkmildir. Sadəcə, yerlərdə insanlar öz məsuliyyətini dərk etməlidir. Düşünürəm ki, İsmayıllıda baş vermiş hadisə ilə bağlı hüquqi baxımdan ciddi tədbir görüləcək və bu, digər müəssisələrdə azyaşlılarla işləyən şəxslərin məsuliyyətini artıracaq”.