"Seçkilər qaydalara uyğun şəkildə keçirilir" - Mustafa Şəntop

Türkiyə Böyük Millət Məclisinin (TBMM) sədri Mustafa Şəntop prezident və parlament seçkilərində səs verib.

Teleqraf.com xəbər verir ki, o, İstanbulda səsvermə hüququndan istifadə edib.

M.Şəntop jurnalistlərə açıqlamasında bütün namizədlərə uğurlar arzulayıb: “Seçkilər qaydalara uyğun şəkildə keçirilir. Türkiyədə indiyə kimi 110-a yaxın seçki olub. 1950-ci ildən bəri Türkiyədə seçkilər yaxşı keçir”.

Parlamant sədri xanımı və övladları ilə birlikdə səsverdiyini diqqətə çatdırıb: “Ölkəmiz və millətimiz üçün xeyirli olsun. İnşallah, axşam nəticələri izləyəcəyik”.

Qeyd edək ki, bu gün Türkiyədə prezident və parlament seçkiləri keçirilir. Seçkilər üzrə 64 milyon 113 min 941 nəfər seçici qeydə alınıb. Bu gün ölkə daxilində 60 milyon 697 min 843 vətəndaş səs verəcək. Xaricdə yaşayan 3 milyon 416 min 98 seçicinin səsverməsi isə bir neçə gün əvvəl yekunlaşıb.

Prezident vəzifəsi uğrunda 3 namizəd mübarizə aparır: - “Cümhur İttifaqı”nın namizədi, hakim Ədalət və İnkişaf Partiyasının sədri, hazırkı dövlət başçısı Rəcəb Tayyib Ərdoğan, “Millət İttifaqı”nın namizədi, müxalif Cümhuriyyət Xalq Partiyasının sədri Kamal Kılıçdaroğlu və “Ata İttifaqı”nın namizədi Sinan Oğan.

“Cümhur İttifaqı”nda Ədalət və İnkişaf Partiyası, Milliyyətçi Hərəkat Partiyası, Böyük Birlik Partiyası, Yenidən Rifah Partiyası, Hür Dava Partiyası və Demokratik Sol Partiyası birləşib.

“Millət İttifaqı”nda Cümhuriyyət Xalq Partiyası, İYİ Partiya, Səadət Partiyası, Gələcək Partiyası, Demokrat Partiyası və Demokratiya və İnkişaf Partiyası (DEVA) təmsil olunur.

“Ata” İttifaqına Zəfər, Ədalət, Ölkəm və Türkiyə İttifaqı partiyaları daxildir.

Parlament seçkiləri üzrə 36 siyasi partiyanın namizədi qeydə alınıb.