Milli Məclis ABŞ-la bağlı bəyanat qəbul etdi - Yeniləndi

Azərbaycan parlamenti noyabrın 21-də ABŞ Senatının ermənilərin müdafiə aktı ilə bağlı bəyanat qəbul edib.

Teleqraf.com xəbər verir ki, bəyanatı Milli Məclisin deputatı, sənədin hazırlanması üzrə komissiyanın üzvü Kamilə Əliyeva oxuyub.

Bəyanatda Birləşmiş Ştatlar Senatının anti-Azərbaycan aktı pislənilib. Eyni zamanda, Vaşinqtona Cənubi Qafqazdakı proseslərlə bağlı obyektiv mövqe tutmaqla bağlı çağırış edilib.

“Azərbaycan parlamenti ABŞ Senatının 15 noyabr tarixli qərarını rədd edir. Vaşinqtonun bu kimi addımları regionda sülh, sabitliyə zərbə vurur. ABŞ-ın təcavüskar Ermənistana dəstəyi Azərbaycan torpaqlarını işğal etməyə yardım edib. ABŞ 30 il ərzində işğalçı Ermənistana qarşı heç bir sanksiya qəbul etməyib, əksinə maliyyə yardımı ayırıb, yüksək səviyyəli görüşlər təşkil edib. Amerika tərəfinin bu kimi addımları ABŞ-ın Azərbaycan cəmiyyətində nüfuzuna zərər yetirib. ABŞ 907-ci düzəlişlə Azərbaycana qarşı 1992-ci ildə etdiyi səhvi təəssüf ki, yenidən etmiş olub”, - bəyanatda vurğulanıb.

***

11:43

Biz bəyanatı qəbul etmək üçün komissiya yaratmalıyıq.

Teleqraf.com xəbər verir ki, bunu Milli Məclisin bu gün keçirilən iclasında spiker Sahibə Qafarova deyib.

Spiker komissiyanın sədrinin Ziyafət Əsgərov, üzvlərinin Səməd Seyidov, Tural Gəncəliyev, Qüdrət Həsənquliyev, Kamilə Əliyeva və Tamam Cəfərova olmasını təklif edib.

Təklif qəbul edilib.