Zaqatalada qəzalı evlərin sakinləri üçün yeni bina tikilir

Zaqatala şəhərinin Şəhriyar küçəsində 2012-ci ilin mayında baş vermiş zəlzələ nəticəsində qəzalı vəziyyətə düşən 4 çoxmənzilli binanın sakinləri üçün yeni yaşayış binasının tikintisinə başlanılıb.

Bu barədə AZƏRTAC-a rayon icra hakimiyyətinin memarlıq və tikinti şöbəsinin müdiri Fərman Əhmədov məlumat verib.

Qurumun rəsmisinin bildirdiyinə görə, 21 mənzilli binanın tikintisi Fövqəladə Hallar Nazirliyinin sifarişi ilə dövlət vəsaiti hesabına həyata keçirilir. Binadakı bütün mənzillər istilik sistemi və daimi içməli su ilə təmin olunacaq.

Hazırda binanın tikintisində torpaq-bünövrə işləri görülür. Yaşayış binasının cari il ərzində istifadəyə verilməsi nəzərdə tutulur.