Nazir qardaşına dələduzluq işi - Proses davam edir

Müdafiə Sənayesi naziri Yavər Camalovun qardaşı Əlikram Camalova qarşı dələduzluq etməkdə təqsirli bilinən Samir Nəbiyevin cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Şəkər Məmmədovanın sədrliyi ilə baş tutan prosesdə Samir Nəbiyev ifadə verməkdən imtina edib.

Daha sonra zərərçəkmiş Əlikram Camalovun oğlu Əkbər Camalov dindirilib. O bildirib ki, 2015-ci ilin noyabr ayında Samir Nəbiyev atasından 11063 dollar alıb: “Həmin puldan isə 3600 manat qaytarıb, qalanını verməyib”.

Şahid qismində ifadə verən Arzu Mərdanov bildirib ki, təqsirləndirilən Samir Nəbiyevin mağazasının yanında mağazası olub: “Mənim Əlikram Camalovla Samir Nəbiyev arasında pul söhbətindən xəbərim vardı . Nə qədər pul aldığını isə bilmirəm. Amma Samir deyir ki, iş məqsədi ilə müəyyən məbləğlərdə Əlikram Camalovdan pul almışam. Pula görə müqavilə imzalananda orada şahid kimi iştirak etmişəm. Əlikram Camalovu mağazaya gələn müştəri kimi tanımışam”.

Növbəti proses avqustun 30-da davam edəcək.

Qeyd edək ki, dövlət ittihamçısı Samir Nəbiyevin 9 il müddətinə azadlıqdan məhrum edilməsini istəyib. Sonradan müdafiə tərəfinin vəsatəti ilə məhkəmə istintaqı təzələnib.

İttihama görə, Samir Nəbiyev iş adamı Əlikram Camalova birgə biznes qurmağı təklif edib. O, Əlikram Camalovdan icarəyə götürüb işlətdiyi “Brend Elektrik” mağazasına yatırım etmək istəyib. Əvəzində qazancın yarısını ona verməyi vəd edib. Əlikram Camalov onunla razılaşıb və Nərimanov rayonu, Ağa Nemətulla küçəsində yerləşən ofisdə Samir Nəbiyevə 2015-ci il noyabrın 3-də 18 min, 2016-cı il fevralın 1-də isə 3 min 993 manat pul verib. Samir Nəbiyev vəsaiti mənimsəyərək, Əlikram Camalova qaytarmayıb.
Təqsirləndirilən şəxs Cinayət Məcəlləsinin 178.3.2-ci (dələduzluq; külli miqdarda törədildikdə) maddəsi ilə ittiham edilir.

Əlikram Camalov kəndli fermer təsərrüfatının təsisçisi və Müdafiə Sənayesi naziri Yavər Camalovun qardaşıdır.