28 Noyabr 2019 12:05
358

Ləğv edilmiş Milli Təhlükəsizlik Nazirliyi (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov və digər şəxslərin kasasiya şikayəti üzrə məhkəmə prosesi keçirilib.

Teleqraf.com xəbər verir ki, Ali Məhkəmədə hakimi Əziz Seyidovun sədrliyi ilə baş tutan prosesdə cinayət işi üzrə təqsirləndirilən daha bir şəxsin kasasiya şikayəti verdiyi məlum olub.

Hakim bildirib ki, Səlim Məmmədov da kasasiya şikayəti verib.

Hakim onun kasasiya şikayətinmi icraatına götürdüyünü açıqlayıb.

Növbəti proses dekabrın 19-da davam edəcək.

Məlumat üçün bildirək ki, Akif Çovdarov və Səlim Məmmədov kasasiya şikayətlərində barələrində bəraət hökmünün çıxarılmasını istəyiblər.

Həmçinin Akif Çovdarov müsadirə olunması üçün üzərinə həbs qoyulan əmlaklarının ona geri qaytarılmasını da xahiş edib.

Bundan başqa, Akif Çovdarovun ailə üzvləri də şikayətçi olub. Akif Çovdarovun oğlu Ruslan Çovdarov, qızları Aidə Qasımova, Günay Əmircanova və yoldaşı İbadət Çovdarova kasasiya şikayəti veriblər.

Onlar əmlaklarının üzərindən həbsin götürülməsini istəyiblər.

Bundan başqa, cinayət işi üzrə bir neçə zərərçəkmiş də Ali Məhkəməyə müraciət ediblər.

Bütün şikayətlər araşdırılması üçün bir icraatda birləşdirilib.

Qeyd edək ki, bu ilin fevralında Akif Çovdarov və digər şəxslərin şikayətinə Ali Məhkəmədə hakim İnqilab Nəsirovun sədrliyi ilə baxılıb. Baxış zamanı şikayətçilər məhkəməyə ərizə ilə müraciət ediblər və şikayətlərindən imtina ediblər.

Bu səbəbdən həmin vaxt məhkəmə qərarı açıqlamayıb və verilən kasasiya şikayətlərini baxılmamış saxlayıb.

Qeyd edək ki, Akif Çovdarov, Səlim Məmmədov, Orxan Osmanov, həmçinin onların vəkilləri tərəfindən kasasiya şikayəti verilib. Onlar günahsız olduqlarını, barələrində bəraət hökmünün çıxarılmasını istəyiblər.

Bakı Hərbi Məhkəməsinin hökmü ilə Akif Çovdarov 12 il, Səlim Məmmədov 11 il, Akif Əliyev 5 il, Orxan Osmanov 4 il azadlıqdan məhrum ediliblər. Məhkəmə Akif Çovdarov və digərlərinin rütbəsinin alınması barədə xüsusi qərardad çıxarıb. Həmçinin Akif Çovdarov və digərlərinə məxsus, üzərinə həbs qoyulmuş əmlakların müsadirə olunması barədə qərar qəbul edilib.

Dövlət Təhlükəsizlik Xidmətinin 3 milyon manatlıq mülki iddiası, eləcə də cinayət işi üzrə tanınmış 60 nəfər zərərçəkmişin mülki iddiası təmin olunub. Məhkəmənin daha bir qərarı ilə 8-ci kilometr bazarı kimi tanınan ticarət müəssisəsi dövlət nəfinə müsadirə olunacaq.

Karvansaray epizodu üzrə iş adamı Qədir Ədilova qarşı cinayətin törədilməsi sübuta yetirilməyib. Həmin epizodlar üzrə cinayət işinə xitam verilib.

Akif Çovdarovun ailə üzvlərinin qaldığı evlər və onların adlarına olan mülklər müsadirə olunmayıb, həmin mülklərin üzərinə qoyulan həbs götürülüb.

Səlim Məmmədovun da ailə üzlərinin yaşadıqları evlərin üzərindən həbs götürülüb, təqaüd kartına qoyulmuş həbs qərarı ləğv edilib. İş üzrə 16 nəfər mənəvi zərərçəkmişin, eləcə də cinayət işində zərərçəkmiş qismində tanınan "Metropolitenin"nin sabiq rəsi və Yeni Azərbaycan Partiyasının Yasamal rayon şöbəsinin rəisi Tağı Əhmədovun 3 milyon manatlıq mülki iddiası da təmin edilməyib.

Hökmə əsasən Akif Çovdarov, Səlim Məmmədov, Akif Əliyev və Orxan Osmanova qarşı istintaq orqanı tərəfindən ittiham irəli sürülən Cinayət Məcəlləsinin 181.3.1-ci (quldurluq; mütəşəkkil dəstə tərəfindən törədildikdə) və 181.3.2-ci (quldurluq; külli miqdarda əmlak əldə etmək məqsədi ilə törədildikdə) maddələri ittihamdan xaric edilib.

Hökmdə həmin maddələr üzrə Akif Çovdarov və digər şəxslərə həmin maddələr üzrə bəraət verilməsi və yaxud cinayət işinə xitam verilməsi qeyd edilməyib.

Sadəcə, hökm elan olunan zaman bu maddələr üzrə cəza təyin edilməyib.

Akif Çovdarov və onunla birlikdə mühakimə olunanlar Bakı Hərbi Məhkəməsinin hökmündən apelyasiya şikayəti veriblər. Onlar günahsız olduqlarını, barələrində bəraət hökmünün çıxarılmasını istəyiblər.

Bundan başqa, Akif Çovdarovun ailə üzvləri və cinayət işi üzrə zərərçəkmişlər də apelyasiya şikayəti veriblər.

Bakı Apelyasiya Məhkəməsinin qərarı ilə tərəflərin apelyasiya şikayətləri təmin edilməyib, Bakı Hərbi Məhkəməsinin hökmü qüvvədə saxlanılıb.

Cinayət işi üzrə 320-dən çox şahid, 60-dan çox zərərçəkmiş var.

Qeyd edək ki, bu cinayət işində adı keçən sabiq idarə rəisi, mayor Akif Əliyevin kasasiya şikayətinə ayrıca icraatda baxılıb. Onun şikayəti təmin olunub və həbsdən azadlığa buraxılıb.

Bundan başqa, Akif Çovdarovla birlikdə məhkum olunan həmin idarənin şöbə rəisi olmuş Orxan Osmanov azadlığa çıxıb.

Ona təyin olunmuş cəza müddəti başa çatıb və cəza çəkmə yerindən azad edilib.


Müəllif: Hacı Zeynalov