Sosial şəbəkədə qadını şantaj edən gənc tutuldu

Bakının Xəzər rayonunda qadından hədə-qorxu ilə pul tələb edən şəxs tutulub.

Bu barədə Teleqraf.com-a Bakı şəhər Baş Polis İdarəsindən məlumat verilib.

Məlumata görə, Xəzər rayon Polis İdarəsinin 1-ci polis bölməsi əməkdaşlarının həyata keçirdikləri əməliyyat-axtarış tədbirləri nəticəsində Tərtər rayon sakini, 1991-ci il təvəllüdlü Əliş Əlişov həbs edilib.

Əliş Əlişov noyabrın 12-də Qala qəsəbə sakini, 1984-cü il təvəllüdlü Vüsalə Şahbazovaya hədə-qorxu gəlməkdə şübhəli bilinib. O, Vüsalə Şahbazovanı sosial şəbəkələrdə şantaj edəcəyini iddia etməklə 3 ədəd mobil telefon, 5000 manat və qızıl-zinət əşyalarını hədə-qorxu ilə tələb edib. Vüsalə Şahbazova şantaj olunması ilə bağlı polisə şikayət edib.

Faktla bağlı cinayət işi başlanıb.

Hacı Zeynalov