16 yaşlı qızı zorlayan kişinin işindən yeni xəbər

Ali məhkəmədə yetkinlik yaşına çatmayan qızı zorlamaqda təqsirli bilinən 1967-ci il təvəllüdlü Əlifağa Bayramovun kasasiya şikayətinə cinayət işi üzrə məhkəmə prosesi başa çatıb.

Teleqraf.com xəbər verir ki, Əlifağa Bayramov ötən ilin fevralın 17-də Fəridə (ad şərti verilib-H.Z.) ilə zorla cinsi əlaqədə olub. Qaradağ Rayon Polis İdarəsi 11-ci polis bölməsi əməkdaşları tərəfindən Əliağa Bayramov həbs edilib. Hamilə qalan qız bu il mart ayında uşaq dünyaya gətirib.

Məlumata görə, 2013-cü ilin avqustunda zorlanan qızın qardaşı Əlifağanın qızını alıb. O vaxtdan qohumluq əlaqələri yaranıb və onlar bir-birlərinin evinə gedib-gəlməyə başlayıblar. Qız Ələt qəsəbəsində atası ilə birlikdə yaşayıb. Qudaların hər ikisi “malyar” işləyirmiş. Sonradan Əlifağa bir yerdə işə getmək üçün gəlib və qudasıgildə qalırmış.

2014-cü ilin mayın 1-də Əlifağa qudasıgilə gəlib, evdə Fəridədən başqa heç kim olmayıb. Əlifağa qızdan atasının harada olduğunu soruşub. O, “evdə yoxdur” cavabı aldıqda içəri keçib və qızı danışdırmağa başlayıb. Sonra qəfildən qızı vurub və Fəridə huşunu itirib. Həmin vaxt qızın 16 yaşı olub.

Ondan sonra təxminən 1 saat qızla cinsi əlaqədə olub. Bir saatdan sonra qız özünə gələndə Əlifağanın artıq evdən çıxıb getdiyini görüb. Qız soyundurulduğunu və üst-başının qan içində olduğunu görüb. Qız bu barədə heç kimə deməyib.

Üç gün sonra gecə yenə Əlifağa qudasıgildə qalıb. Səhər qızın atası işə tez gedib. Əlifağaya da deyib ki, ondan sonra gələr. Qızın atası çıxandan sonra Əlifağa qızı yatdığı çarpayısında zorlayıb. Bu dəfə qız özündə olub, müqavimət göstərib. Əlifağa qızı döyərək onunla cinsi əlaqədə olub. O, qıza hədə-qorxu gəlib ki, kiməsə desən, sənin başını kəsəcəyəm. Əlifağa qızı 3 dəfə zorlayıb.

Bu hal sonuncu dəfə 2014-cü ilin iyun ayının axırlarında olub. O, qızı guya gəlinlərini görmək üçün Salyan rayonunun Kürsəngi kəndinə öz evlərinə aparıb. Yolda istiqaməti dəyişib və qıza deyib ki, qısa yolla gedəcəyik. Heç kimin olmadığı bir yerə gələndə o, yenə də maşında qızı zorlayıb. Bundan sonra qız hamilə qalıb. Hakim Eynulla Vəliyevin sədrliyi ilə keçirilən qapalı prosesdə təqsirləndirilən şəxsə hökm oxunub.

Bakı Ağır Cinayətlər Məhkəməsinin hökmü ilə Əlifağa Bayramov 10 il müddətinə azadlıqdan məhrum edilib. Hökmdən narazı qalan Əlifağa Bayramov apelyasiya şikayəti verib. O, günahsız olduğunu iddia edərək barəsində bəraət hökmünün çıxarılmasını istəyib.

Bakı Apelyasiya Məhkəməsində, hakim İlqar Murquzovun sədrliyi ilə keçirilən prosesdə Əlifağa Bayramov işinə məhkəmə istintaqı ilə baxılmasını istəyib. Amma işə baxan hakimlər onun istəyini nəzərə almayıb və apelyasiya şikayətinə məhkəmə istintaqı aparılmadan baxılması barədə qərar qəbul ediblər.

Qərardan narazı qalan Əlifağa Bayramov kasasiya şikayəti verib. O, Ali Məhkəməyə göndərdiyi şikayətində Bakı Apelyasiya Məhkəməsinin onun işi ilə bağlı çıxardığı ilkin baxış iclasının qərarının ləğv edilməsini istəyib.

Onun şikayəti Ali Məhkəmənin hakimi İlham Cəfərovun sədrlik etdiyi kollegiyada araşdırılıb. Hakimlər Əlifağa Bayramovun kasasiya şikayətini təmin etməyiblər. Qərara alınıb ki, Əlifağa Bayramovun apelyasiya şikayəti məhkəmə istintaqı aparılmadan baxılmalıdır.

Hacı Zeynalov