"Onlar bunun şahidi olacaqlar…" - Foto

Ümumdünya Mədəniyyətlərarası Dialoq Forumuna tərəfdaş olan qurumların sayı artmaqdadır. Bu, bizdə nikbinlik yaradır. Forum real olaraq bəşəri prosesə çevrilir.

Teleqraf.com xəbər verir ki, bu fikirləri Mədəniyyət və Turizm naziri Əbülfəs Qarayev mayın 4-dən 6-dək Bakıda keçirilən IV Ümumdünya Mədəniyyətlərarası Dialoq Forumu çərçivəsində “Mədəniyyətlərarası dialoqun inkişafı: İnsan təhlükəsizliyi, sülh və davamlı inkişafı üçün yeni imkanlar” mövzusunda təşkil olunan mətbuat konfransında çıxışı zamanı deyib.

Nazir BMT-nin Ərzaq və Kənd Təsərrüfatı Təşkilatının həmtəşkilatçı qismində iştirakını xüsusi olaraq vurğulayıb. Onun sözlərinə görə, mədəniyyətlərarası dialoq olduqca vacib amildir:

“İnsanların təhlükəsiz qidalanması Forumun təşkilatçı qismində iştirakına təkan verib. Ümid edirəm ki, Forum çərçivəsində ölkəmizdə qonaq olan BMT-nin Ərzaq və Kənd Təsərrüfatı Təşkilatının nümayəndələri Azərbacan qidasının ləzzətli, dadlı və təhlükəsiz olduğunun əyani şahidi olacaqlar. Sabah müxtəlif sessiyalar üzrə çıxışlar zamanı BMT-nin Ərzaq və Kənd Təsərrüfatı Təşkilatının xoşməramlı səfiri Leyla Əliyevanın çıxışı da olacaq. Mən bu quruma Foruma göstərdiyi dəstəyə görə təşəkkürümü bildirirəm”.

Nərgiz

Foto: Elçin MURAD