Güneyli Elmira: Tanrı, nə olar?... – İldönüm/Foto

Güney azərbaycanlı gənc şairə, mədəni fəal Elmira Kəriminin vəfatının birinci ildönümüdür.

Teleqraf.com xəbər verir ki, Güney Azərbaycan çağdaş ədəbiyyatını müasir üslubda yazan Elmira Kərimi 32 yaşında onkoloji xəstəlikdən dünyasını dəyişib.

Mərhumun şeirləri əsasən qadın hüquqları və müxtəlif həyat hadisələri ilə insan varlığının qarşılaşması haqdadır.

1984-cü il fevralın 26-da Qərbi Azərbaycan əyalətinin Salmas şəhərində anadan olan Elmira Kərimi Həmədan Universitetinin Kitabxanaçılıq fakültəsini bitirib. Elmira Azərbaycan türkcəsində şeirləri ilə ədəbiyyatsevərlərin diqqətini çəkib. Onun əsərləri və mədəni sahədəki fəaliyyəti Azərbaycan milli hərəkat fəalları tərəfindən də yüksək qiymətləndirilir.

Elmiranın Feysbukda paylaşdığı son şeiri eyni zamanda onun həyata vida şeiridir:

Ay... Günəş... Özləyəcəyəm bütün varlığını

Bir daha görə bilməyəcəyim çox şey var

Toxunuram hər bir yerə

Bir anlıq olmalı olsa da

İzi qalsın məndə həyatın

İçimə çəkə-çəkə baxıram

Sanki içimdə qazılır varlıq

Biz bu dünyadan gedəndə

Yoxluq bizi qucaqlayıb

Göməcək əbədiyyətə.

Düşünürəm, bütün insanlar dünyadan gedəndə

Dünyasını da gömsələr

Necə olar dünya!

Tanrı nə olar?