Basarkeçərdə yollar bağlandı: Yeni mer and içdi

Basarkeçər (Vardenis) bölgəsində ötən cümə axşamı seçilmiş şəhər meri Aharon Xaçatryanın andiçmə mərasimi keçirilib.

Teleqraf.com erməni mediasına istinadən xəbər verir ki, polis qüvvələri səhər saatlarından Vardenisdə cəmləşib.

Polis Basarkeçər (Vardenis) administrasiyasına girişi bağlayıb. Onlar bildiriblər ki, İnzibati Məhkəmə qərar verənə qədər binaya giriş bağlanacaq.

Müxalifət Xaçatryanın inauqurasiya mərasimini açıq havada təşkil edib.

Xatırladaq ki, dekabrın 5-də Basarkeçərdə (Vardenis) yerli özünüidarə orqanlarına keçirilən seçkilərdən sonra “Mülki müqavilə” partiyası 13, “Aharon Xaçatryan” bloku 10, “Birləşmiş Vardenis” 4 mandat alıb. Koalisiya yaradan müxalifət bələdiyyə sədri seçmək üçün lazımi sayda mandat təmin edə bilib. Bundan sonra “Birləşmiş Vardenis” partiyasının siyahısında birinci olan Aram Arutyunyan həbs edilib.

Dekabrın 30-da Vardenis bələdiyyə şurasının ilk iclası keçirilib və Aharon Xaçatryan mer elan olunub. Hakim “Mülki Müqavilə” partiyasının nümayəndələri iclası boykot edərək, görüşün qanunsuz olduğunu bildirib. Çünki görüş ilkin olaraq yanvarın 3-nə planlaşdırıldığından Mülki Müqaviləyə heç kim xəbərdarlıq etməyib.

Faktla bağlı İnzibati Məhkəməyə iddia qaldırılıb.