Rusiya və Türkiyə arasında nə baş verir? - Ərdoğandan sürpriz gediş

“NATO-nun iyulun 11-12-də Vilnüsdə keçiriləcək sammiti öncəsi Türkiyə Prezidenti Ərdoğan bu hərbi blokun gündəliyindəki iki vacib məsələ ilə bağlı növbəti usta və çox önəmli gedişlərindən birini etdi. O, ukraynalı həmkarı Zelenski ilə sammitöncəsi görüşündə “Ukrayna NATO üzvü olmağa layiqdir” bəyanatını səsləndirməklə, daha sonra “Azov” alayının komandirlərini Kiyevə təhvil verməklə, ardınca İsveçin bu toplantıda NATO üzvlüyünü əngəlləyəcək açıqlamaları ilə isə Rusiyayla münasibətlərdə ənənəvi balansı qoruyub saxlamağa çalışır”.

Teleqraf.com xəbər verir ki, bunu politoloq Elxan Şükürlü deyib.

“Ərdoğan yaxşı bilir ki, müharibə bitmədən, ərazisindəki münaqişəli durum qaldıqca, Ukraynanı NATO-ya üzv etməyəcəklər. Ukrayna yalnız o halda tezliklə NATO-ya üzv olar ki, ya qısa zaman içərisində Rusiya qoşunlarını məğlub edərək tamamilə öz ərazisindən vurub çıxarsın, 1991-ci il sərhədlərini bərpa etsin, ya da Henri Kissincerin ötən il səsləndirdiyi təkliflə razılaşsın - ərazilərinin bir hissəsinin itirilməsiylə barışsın.

Bunu Zelenski də yaxşı anlayır və o, “müharibə bitdikdən dərhal sonra” Ukraynanın NATO və Avropa İttifaqı üzvlüyünə qəbul edilməsini indidən zəmanət altına almağa çalışır. Çünki bu müharibənin haçan və necə bitəcəyi indi heç Zelenskiyə də məlum deyil. O, hazırda Ukraynaya ciddi hərbi-siyasi dəstək verən, onu həlledici əks-hücuma təhrik edən Qərbin sonadək onun arxasında duracağına, Ukraynanın maraqlarına zidd şərtlər altında Rusiya ilə sövdələşmə masası arxasına keçməyəcəyinə əmin deyil”, - ekspert bildirib.

Elxan Şükürlü qeyd edib ki, belə bir kritik ərəfədə həm Rusiya, həm də Ukrayna ilə münasibətlərdə ortaya qoyduğu müstəqil iradə və balanslı mövqe isə Prezident Ərdoğanın müharibə aparan hər iki tərəf arasında uğurlu və səmimi vasitəçilik imkanlarını xeyli artırır, hətta bu işdə onu Çindən də bir addım önə keçirir:

“Ötən ilin martında Türkiyə uğurla Rusiya-Ukrayna danışıqlarına vasitəçilik edirdi, ancaq bu savaşın bitməsini istəməyənlər Buçadakı məlum qırğını təşkil etməklə danışıqların pozulmasına nail oldular.

Əgər Rusiya Prezidenti Putinin Türkiyəyə avqustda planlaşdırılan səfəri baş tutacaqsa və bu müddətədək real döyüş meydanında Ukraynanın əks-hücumlarının nəticəsi də bəlli olacaqsa, böyük ehtimalla, bu görüş Rusiya-Ukrayna münasibətlərinin Türkiyənin vasitəçiliyi ilə sülh yoluyla çözülməsində yeni bir başlanğıc olacaq.

Ərdoğanın Ukrayna ilə bağlı son addımlarının Rusiya-Türkiyə münasibətlərini gərginləşdirəcəyi və Türkiyənin artıq Rusiyaya qarşı Qərbin yanında yer alacağı haqda bəzi qərbpərəst siyasətçilərin, Qərb təbliğatına trolluq edənlərin sevincək proqnozları, gözləntiləri isə növbəti dəfə suya düşəcək. Çünki Rusiya ilə Türkiyə arasında 2016-cı ildən başlayan yaxınlaşma strateji xarakter daşıyır və bu yaxınlıq artıq hər iki dövlətin milli təhlükəsizlik məsələsidir”.