26 Oktyabr 2016 10:57
615

SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov keçmiş futbolçu Maşallah Əhmədovun SOCAR-da işə düzəltmək adı ilə tanışından 20 min dollar pul almasına münasibət bildirib.

Teleqraf.com xəbər verir ki, bu barədə Xalik Məmmədov sosial şəbəkədə yazdığı statusunda qeyd edib ki, tanınmış futbolçu özünün cəmiyyətdəki etibarından istifadə edərək dələduzluq edib və 200 min manatdan çox başqasının pulunu mənimsəyib: “Bəlkə də bu mənim diqqətimi o qədər də cəlb etməzdi, çünki belə dələduzluq faktlarına mətbuatda vaxtaşarı rast gəlmək olur.

Burada mənim diqqətimi SOCAR-a işə adam düzəltmək bəhanəsi ilə özgəsinin 20 min manat pulunu da alıb, qocaman, hamının sevimlisi, futbol azarkeşi, heç kimə yox deməyi bacarmayan, korifeyimiz, akademikimizin yanına da aparmış və zərərçəkənin sənədlərini ona təqdim edib.

Tutaq ki alınsaydı və o adam işə götürülsəydi... Əslində mümkün olsaydı o, kişiyə heç kim imtina etməzdi. Bu indi qəti mümkün olmadığından, sistemin buna imkan vermədiyindən alınmayıb.

Nə olardı? Sevimli, təmiz, nümunəvi ağsaqqal (Xoşbəxt Yusifzadə- red.) bir insanın adına, nüfuzuna nə qədər kölgə salardı bu futbolçunun hərəkəti? Yazıqlar olsun. Allah qapısını açsın, neyləmək olar..."

Vitse-prezident qeyd edib ki, SOCAR-a işə qəbul müsabiqə yolu ilə həyata keçirilir: “Deyirik, yazırıq, dəfələrlə İnsan Resurslarının Departamentinin rəhbərliyinin bəyanatləri olub. SOCAR-a işə qəbul müsabiqə yolu ilə həyata keçirilir. Əsas meyar, bilikdir, səriştədir, bacarıqdır. Tanış, dost, dayı keçmir”.

Qeyd edək ki, məhkəmədə zərərçəkmiş Yusif Əzizov Maşallah Əhmədova oğlunu “SOCAR”da işə düzəltmək 20 min dollar verdiyini və bu səbəbdən SOCAR-ın 1-ci vitse-prezidenti, akademik Xoşbəxt Yusifzadə ilə görüşdüyünü də qeyd edib.

İlhamə ƏBÜLFƏT


Müəllif: