Komitə nümayəndələri Nərminin ailəsinə baş çəkdilər

Ailə, Qadın və Uşaq Problemləri üzrə Dövlət Komitəsinin (AQUPDK) nümayəndələri Tovuzda yandırılaraq öldürülən 10 yaşlı Nərmin Quliyevanın ailəsinə baş çəkib.

Dövlət Komitəsindən Teleqraf.com-a verilən məlumata görə, Komitə nəzdində fəaliyyət göstərən Göygöl Uşaq və Ailələrə Dəstək Mərkəzinin əməkdaşları (sosial işçi və psixoloq) Tovuz rayonunun Dondar Quşçu kəndində yanaraq qətlə yetirilən 10 yaşlı Nərmin Quliyevanın ailəsini ziyarət ediblər.

"Ziyarət zamanı ailənin digər uşaqları və valideynlərlə söhbət aparılaraq, ailə sosial-psixoloji baxımdan qiymətləndirilib. Ehtiyac olacağı təqdirdə ailə ilə müvafiq işlər aparılacaq. Uşaqlara qarşı istənilən laqeyd münasibət, zorakılıq, qəddar davranış yolverilməzdir və bu cür hallarda qanunvericiliyə əsasən zorakılığı törədənlər mütləq şəkildə məsuliyyətə cəlb ediləcək", deyə məlumatda bildirilib.