Çovğuna düşən 10 nəfər xilas edildi

Savalan dağında qar və çovğuna düşən 10 nəfər dağçı Qızıl Aypara Cəmiyyətinin xilasediciləri tərəfindən qurtarılıb.

Teleqraf.com musavat.com-a istinadən xəbər verir ki, bu barədə Ərdəbil Vilayətinin (ostan) Qızıl Aypara Cəmiyyətinin müdir-amili məlumat verib.

Bəhram Qeybi deyib ki, hadisə cümə günü baş verib: “Savalan dağı zirvələrində qar və çovğuna düşən 10 nəfər dağçı ölümdən qurtarılıb. Hadisəyə hava şəraitinin əlverişsiz olması və dağçıların istiqamətlərini itirməsi səbəb olub. Hadisədən xəbər tutunca bizim xilasedicilərimiz müəyyən təchizatla birlikdə Savalan dağına gedib və keçilməz yollarla yüksəkliklərə çıxıb və həmin dağçıları ölümdən qurtarıblar. Onlar xəstəxanaya aparılacaq”.

GünAz TV-nin xəbərinə görə, son günlərdə Güney Azərbaycanın Ərdəbil bölgəsinə leysan yağışlar yağıb. Dağlıq ərazilərə, o cümlədən Savalan dağı yüksəkliklərinə isə qar düşüb.