Bakıdan gözlənilməz gediş – “Ermənistanın bir yolu qaldı...”

“Zəngəzur dəhlizi layihəsinin həyata keçirilməsinə müxtəlif bəhanələr yaradan Ermənistanın tranzit ölkə olmaq şansını əldən verməmək və dalandan çıxmaq üçün yeganə çıxış yolu üzərinə götürdüyü öhdəlikləri yerinə yetirməkdən ibarətdir”.

Teleqraf.com xəbər verir ki, bunu politoloq Elçin Mirzəbəyli deyib.

Siyasi ekspert İran və Azərbaycan arasında əldə edilmiş son anlaşmaya diqqət çəkib:

"Azərbaycanın Şərqi Zəngəzur iqtisadi rayonu ilə Naxçıvan bölgəsi arasında yeni kommunikasiya bağlantılarının yaradılması haqqında İranla anlaşma memorandumunun imzalanması tarixi hadisədir və zaman keçdikcə dəyəri daha çox bilinəcək. Dəhliz Azərbaycanın logistik imkanlarını artıracaq və ölkəmizin nəqliyyat dəhlizlərinin önəmli qovşaqlarından biri kimi mövqelərini, həmçinin Ermənistanın dalan-dövlət “statusu”nu daha da möhkəmləndirəcək, məğlub ölkənin bölgədənkənar təhrikçi-himayədarlarının təlimatları əsasında həyata keçirdiyi pozucu və manipulyativ addımları təsirsiz hala gətirəcək.

Məlum olduğu kimi memorandumun məqsədi Azərbaycanın Şərqi Zəngəzur iqtisadi rayonu ilə İran ərazisindən keçməklə Naxçıvan arasında yeni dəmir yolu, avtomobil yolu əlaqəsinin, eləcə də rabitə və enerji təminatı xətlərinin yaradılmasından ibarətdir. Bu isə Azərbaycanın əsas ərazisi ilə Naxçıvan arasında maneəsiz kommunikasiyanı təmin edəcək, muxtar respublikanın tamamilə blokadadan çıxmasına zəmin yaradacaq.

İndiki şəraitdə, Zəngəzur dəhlizi layihəsinin həyata keçirilməsinə müxtəlif bəhanələr yaradan Ermənistanın tranzit ölkə olmaq şansını əldən verməmək və dalandan çıxmaq üçün yeganə çıxış yolu üzərinə götürdüyü öhdəlikləri yerinə yetirməkdən ibarətdir. Əks təqdirdə, məğlub ölkənin təcrid vəziyyətindən çıxmaq imkanı olmayacaq. Hətta Zəngəzur dəhlizi ilə bağlı bütün öhdəliklərin yerinə yetiriləcəyi və dəhlizin işə düşəcəyi təqdirdə, rəsmi İrəvanın hər hansı bir təxribatçı davranışı dəhlizin bağlanmasına zəmin yaradacaq və bu halda Azərbaycanın Ermənistan ərazisindən kənar alternativi olduğu üçün ölkəmizin və tərəfdaşlarının maraqlarına hər hansı bir ziyan dəyməyəcək. Ermənistan isə, əksinə, daha ağır nəticələrlə üzləşəcək”.

Elçin Mirzəbəyli qeyd edib ki, İran ərazisindən keçməklə Azərbaycanın Şərqi Zəngəzur iqtisadi rayonu ilə Naxçıvan Muxtar Respublikası arasında yeni kommunikasiya bağlantılarının yaradılması haqqında anlaşma memorandumunun imzalanmasını Ermənistanın, eləcə də bu ölkə vasitəsi ilə bölgədə davamlı sülhün, təhlükəsizliyin və əməkdaşlığın təmin olunmasına maneə yaradan dairələrin bütün perspektiv təxribatlarına qarşı önləyici tədbir kimi də qəbil edilə bilər:

“Möhtəşəm gedişdir və Azərbaycanın böyük diplomatik uğurudur”.