19 Aprel 16:31
757
12 Punto 14 Punto 16 Punto 18 Punto

Rusiya sülhməramlılarının Azərbaycan ərazisindən çıxarılması Dövlət Dumasının ermənipərəst deputatı Konstantin Zatulini məyus edib.

Teleqraf.com xəbər verir ki, o, separatçı məyusluğunu Ermənistanın keçmiş baş naziri Vazgen Manukyana göndərdiyi cavab məktubunda bildirib.

Sülhməramlıların Qarabağdan çıxarılmasına görə Rusiyanı qınayan Manukyana cavab verən Zatulin “ermənilər və rusların Məsih əzabları”na diqqət çəkib.

Hər fürsətdə ölkəmizə qarşı kin püskürən, ermənidən çox erməni olduğunu sübut etməyə çalışan Zatulin yenə də fərqli fikirdə deyil, Azərbaycanın öz ərazi bütövlüyünü bərpa etməsi və ya Qarabağı işğaldan azad etməsini “acı həqiqət” adlandırıb.

“Rusiyanı qınayırsınız ki, onun 2020-ci ildən başlayaraq davranışı “müttəfiqlik anlayışı”na uyğun gəlmir, hesab edirsiniz ki, silahlı qüvvələrimizin Qarabağdan çıxarılması son nöqtəni qoyur. Bu, bizim əlifbamızda yoxdur. Əlbəttə, bilirsiniz ki, mən və Rusiyadakı həmkarlarım ən azı Qarabağdakı sülhməramlı əməliyyatımızın belə sonlanmasını istəməzdik. Amma 2020-ci ildən, xüsusən də 2022-2023-cü illərdə baş verənlərdən sonra əvvəlcə ermənilər, sonra isə rusların Qarabağı tərk etməsi əvvəlcədən müəyyən edilmişdi. Bu acı həqiqətdir”, - ermənipərəst deputat bildirib.

Zatulin separatçı məktubunda XIX əsrin əvvəllərində ermənilərin Azərbaycan ərazisinə - Qarabağa köçürülməsində müstəsna rol oynamış Aleksandr Qriboyedovu da xatırladıb. Bu gün “belələrinin” olmamasından təəssüfünü ifadə edib.

“Səbəbləri və halları qısa bir məktubda sadalamaq, sizi təkrarlamaq və mənimkini əlavə etmək istəmirəm. Qriboyedovlar və baqramyanlar lazımi anda lazımi yerdə görünmədilər. Sizin bugünkü Rusiyanı qınamağınıza mən də bugünkü Ermənistanı danlamaqla qarşılıq verə bilərdim, amma istəmirəm”, - siyasətçi qeyd edib.

Konstantin Zatulin həmişə anti-Azərbaycan mövqeyi ilə seçilib, işğal dövründə separatçılara verdiyi dəstək də məlumdur. Elə buna görə ölkəmizdə “arzuolunmaz şəxs” elan edilib. Yəni bu adamın niyə ərazilərimizin azad etməsindən təəssüfləndiyi təəccüblü deyil. Ən azı bu mövzu onun üçün “çörək ağacı” idi, indi əlindən alınıb, “ermənilər üçün çəkdiyi Məsih əzabı” bundandır.


Müəllif: Mənsur Rəğbətoğlu