Zaqatalada 3 evdən daş-qaş oğurlandı – Sərhəddə ələ keçdi

Zaqatala rayonunda evlərdən oğurluq edən şəxsin tutulması üçün əməliyyat keçirilib.

Teleqraf.com xəbər verir ki, rayonun Aşağı Tala kənd sakini Asif Hacıyevin evindən oğurluqla bağlı polis şöbəsinə məlumat daxil olub.

Oğrular Asif Hacıyevin evindən həyat yoldaşı Afət Hacıyevaya məxsus brilyant qaşlı 1 nişan üzüyü, 1 ədədə qızıl kişi üzüyü, 2 ədəd qızıl boyunbağı, 1 ədəd qızıl qolbağı, 1 ədəd qızıl boyunbağı klounla birlikdə, 1 ədəd qızıl qadın saatı qızıl zənciri ilə birlikdə, 1 ədəd qızıl qırmızı qaşlı üzük, 1 ədəd 3 qaşlı brilyant üzüyü oğurlanıb.

Ümumilikdə oğurlanan qızıl əşyalarının dəyəri 10 min manat olub.

Müəyyən edilib ki, həmin cinayəti Aşağı Tala kənd sakini, 1996-cı il təvəllüdlü Elxan Canımov törədib.

Onun ətrafında həyata keçirilən əməliyyat tədbirləri nəticəsində başqa cinayətlərdə də iştirak etdiyi müəyyən olunub. O, Aşağı Tala kənd sakini Firuzə Əliyevanın yaşadığı evindən dəyəri min manat olan 1 ədəd kişi qızıl üzüyü, 2 ədəd qızıl qadın üzüyü oğurlayıb.

Bundan başqa, Elxan Canımov digər həmkəndlisi Müəzəffər Mustafayevin evindən dəyəri min manat olan 1 ədəd qızıl qolbağını oğurlayıb.

Saxlanılan şəxs ələ keçməmək üçün qızılları ayrı-ayrı yerlərdə gizlədib və Balakən rayon Mazımçay sərhəd keçid məntəqəsini keçmək istəyərkən saxlanılıb.