“Qəbələ”nin məşqçisi qəzada həlak oldu - Foto/Yeniləndi

"Qəbələ" futbol klubundan Trend-ə verilən məlumata görə, Qəbələdə yol qəzasında ölən Teymur Musayev “Qəbələ” futbol akademiyasının məşqçisi olub.

Bildirilib ki, hadisə gecə saat 02:30 radələrində baş verib. Teymur Musayev evə qayıdarkən dostu 1952-ci il təvəllüdlü Rafiq Qurban oğlu Məmmədovun idarə etdiyi avtomobil yol kənarındakı ağaca çırpılıb. Qəza nəticəsində məşqçi dünyasını dəyişib.

Teymur Musayev ailəli idi, iki oğlu və bir qızı var.

Sürücü Rafiq Məmmədov isə Qəbələ rayon Müalicə Diaqnostika Mərkəzinə gətirilib. Mərkəzdən Trend-ə verilən məlumata görə, onun vəziyyəti ağırdır, hər iki bud nahiyəsində sınıqlar var, döş qəfəsi ciddi zədələnib. Hazırda reanimasiyaya yerləşdirilib.

***

09:30

Qəbələ şəhərində “Toyota” markalı minik avtomobili yol kənarındakı ağaca çırpılıb.

FHN-dən Teleqraf.com-a verilən məlumata görə, hadisə yerinə cəlb olunmuş Şimal-qərb Regional Mərkəzinin müvafiq xilasetmə qüvvələri avtomobildə sıxışıb qalan sərnişin, 1974-cü il təvəllüdlü Musayev Teymur Siracəddin oğlunun meyitini nəqliyyat vasitəsindən çıxarıblar.

"Qafqazinfo" xəbər verir ki, qəzada həlak olan “Qəbələ” futbol akademiyasının məşqçisi Teymur Musayevdir.

Teymur Musayevin qəzaya düşüdüyü maşın isə dostuna məxsus olub.