Kürdəmirdə minik avtomobili yük maşınına çırpıldı - 1 nəfər öldü, 4 nəfər yaralandı

Kürdəmirin Atakişili kəndində ağır yol qəzası baş verib, ölən və xəsarət alanlar var.

Teleqraf.com xəbər verir ki, Bakı şəhər sakini, 24 yaşlı Xasıyanov Ruslan Əli oğlunun idarə etdiyi “Toyota Prius” markalı avtomobil Gəncə istiqamətində hərəkətdə olarkən yol kənarında dayanmış, Bərdə rayon sakini 26 yaşlı Allahverdiyev Salman Lətif oğluna məxsus “Mercedes” markalı yük maşınına çırpılıb. Nəticədə “Toyota Prius”da olan sərnişin, 23 yaşlı Mənsimov Elnur Cavanşir oğlu hadisə yerindəcə dünyasını dəyişib.

Qəza zamanı habelə sürücü və digər sərnişinlər - Bakı şəhər sakinləri 32 yaşlı Qasımov Vahid Hüseynağa oğlu və 1991-ci il təvəllüdlü Səmədov İslam Rövşən oğlu, eləcə də ”Mercedes” in sürücüsü S.Allahverdiyev ağır xəsarətlər alıblar.

Yaralılar təcili tibbi yardım maşınının köməyi ilə Kürdəmir rayon Mərkəzi Xəstəxanasına aparılıb.

Faktla bağlı araşdırma aparılır.