"Yəməndə hərbi əməliyyat dayandırılmalıdır"

İranın Azərbaycandakı səfiri Möhsün Pakayin Yəməndə baş verən hadisələrlə bağlı narahatlığını bildirib.

Bu barədə Trend İranın Azərbaycandakı səfirliyinə istinadən məlumat verir.

M.Pakayin Yəməndəki ağır vəziyyət və dinc sakinlərin öldürülməsindən narahatlığını qeyd edib və beynəlxalq ictimaiyyəti, regionun sülhsevər ölkələrini Yəmənə qarşı hərbi əməliyyatların dayandırılması üçün çalışmağa çağırıb.

İranın Azərbaycandakı səfiri bildirib ki, müstəqil bir ölkəyə qarşı hərbi əməliyyatların aparılması bu ölkənin suverenliyini pozmaq deməkdir və beynəlxalq qanunlara ziddir: “Bu kimi hücumların dinc və günahsız insanların öldürülməsi, dağıntılar və insanların evlərindən didərgin düşməsindən başqa nəticəsi yoxdur”.

Səfir, həmçinin Suriya kimi müstəqil ölkələrə hücumların qarşısında beynəlxalq qurumların sakit qalmasının bölgədə gərginliyin artması ilə nəticələndiyini bildirib. Diplomat beynəlxalq ictimaiyyətin Suriya ilə bağlı səhvinin Yəmənə münasibətdə təkrarlanmayacağına ümid etdiyini də söyləyib.

M.Pakayin bildirib ki, İran Yəməndəki prosesləri diqqətlə izləyir: “Yəmənin daxili münaqişəsi dinc yolla və danışıqlarla digər ölkələrin müdaxiləsi olmadan həll olunmaldıır.”

O deyib ki, İran Yəməndə böhranın yarandığı ilk gündən yəmənli qruplarla danışıqlar aparılmasını istəmişdi: "İran inanır ki, üçüncü bir ölkənin Yəmənə hərbi müdaxiləsi böhranın daha da dərinləşməsinə - terrorizmin, gərginliyin artmasına səbəb olacaq".

Diplomat eyni zamanda qeyd edib ki, İran sülhsevər bir ölkə olaraq Yəməndə beynəlxalq hüquqların pozulmasının qarşısını almaq üçün çalışacaq.

Qeyd edək ki, Səudiyyə Ərəbistanı martın 25-də husilərin Yəməndə ölkənin cənub regionlarına irəliləməsinin qarşısını almaq və BMT-nin rəsmi tanıdığı prezident Əbd Rəbbi Mənsur Hadinin yenidən hakimiyyəti ələ keçirməsi məqsədilə Yəmənə hava hücumlarına başlayıb. Səudiyyə Ərəbistanı 10 ərəb ölkəsinin bu əməliyyatı dəstəklədiyini bildirib. ABŞ husilərə qarşı hücumları dəstəkləyib.

Husilər keçən ilin sentyabrından Yəmənin paytaxtı Səna şəhərinə hücum edib, M.Hadi hakimiyyətini devirərək paytaxtı nəzarətə götürüblər. M.Hadi keçən ay ölkənin cənubunda yerləşən Ədən şəhərinə sığınıb. Husilər cəbun regionlarına irəlilədiyinə görə onun ölkədən çıxdığı bildirilir.

Xatırladaq ki, M.Hadi BMT Təhlükəsizlik Şurası və Ərəb Dövlətləri Liqasından husiləri dayandırmaq üçün hərbi yardım istəmişdi.