"Bu "seçkilər" heç bir beynəlxalq hüquqa söykənmir" - AÇIQLAMA

Qondarma Dağlıq Qarabağ separatçı rejimi sentyabrın 13-də Azərbaycanın işğal edilmiş ərazilərində "özünüidarə orqanları"na qanunsuz "seçkilər" keçirəcək.

Bununla bağlı Xarici İşlər Nazirliyi etiraz bəyanatı yayıb. Bəyanatda XİN Azərbaycanın işğal edilmiş ərazilərində Ermənistan tərəfindən yaradılmış separatçı rejimin təcavüz və irqi ayrı-seçkiliyin mütləq nəticəsi olduğunu bir daha vurğulayır: "Avropa İnsan Hüquqları Məhkəməsinin 16 iyun 2015-ci il tarixli "Çıraqov və digərləri Ermənistana qarşı" işi üzrə çıxardığı qərarında da təsdiq edildiyi kimi, bu rejim Ermənistanın idarəçiliyi və nəzarəti altındadır və Ermənistanın hərbi, siyasi, maliyyə və digər dəstəyi sayəsində öz mövcudluğunu davam etdirir.

Ermənistanın Azərbaycana qarşı müharibəyə başladığı və zordan istifadə edərək Dağlıq Qarabağ və ətraf yeddi rayon daxil olmaqla, Azərbaycan ərazisinin 20 faizini işğal etdiyi və bir milyondan artıq azərbaycanlını öz doğma torpaqlarından didərgin salaraq etnik təmizləmə həyata keçirdiyi və digər ağır cinayətlər törətdiyi hamıya yaxşı məlumdur. BMT Təhlükəsizlik Şurasının 822 (1993), 853 (1993), 874 (1993) və 884 (1993) saylı qətnamələrində təsbit olunduğu kimi, beynəlxalq ictimaiyyət Azərbaycana qarşı zor tətbiq edilməsi və bunun nəticəsində Azərbaycanın ərazilərinin işğalını kəskin şəkildə pisləyib və Azərbaycanın suverenliyi və ərazi bütövlüyünü pozan istənilən əməlləri rədd edərək, bu əməllərin nəticəsində yaradılmış vəziyyətin qanuniliyinin tanınmaqdan imtina edib".

Bəyanatda daha sonra qeyd edilir ki, "qondarma "seçkilər"in keçirilməsi bir daha aydın şəkildə göstərir ki, status-kvonun saxlanılması, işğalçı siyasətinin və ilhaq niyyətlərinin möhkəmləndirilməsi üçün davamlı addımlar ataraq, Ermənistanın silahlı münaqişənin siyasi həllində həqiqətən maraqlı deyil və əksinə olaraq, təxribat və vəziyyəti gərginləşdirmək yolunu tutub: "Azərbaycan ərazilərinin hərbi işğalının və etnik təmizləmə siyasətinin davam etdiyi zəmində bu qurama "seçkilər" Azərbaycan Respublikasının Konstitusiyası və beynəlxalq hüququn norma və prinsiplərinin açıq şəkildə pozulmasıdır və buna görə də bu "seçkilər"in heç bir hüquqi qüvvəsi ola bilməz".

XİN hesab edir ki, Ermənistan işğal edilmiş Azərbaycan ərazilərini ilhaq etməyə müyəssər ola bilməz: "Davamlı və uzunmüddətli nizamlanmaya nail olunmasının yeganə yolu yuxarıda qeyd edilən BMT Təhlükəsizlik Şurasının qətnamələrində də tələb edildiyi kimi, Ermənistan silahlı qüvvələrinin Azərbaycanın Dağlıq Qarabağ regionu və digər işğal olunmuş ərazilərindən qeyd-şərtsiz və tamamilə çıxarılması, məcburi köçkünlərin öz doğma torpaqlarına və mülkiyyətlərinə qayıtmaları üçün ayrılmaz hüquqlarının təmin edilməsidir. Bu münaqişə yalnız Azərbaycan Respublikasının beynəlxalq səviyyədə tanınmış sərhədləri daxilində suverenliyi və ərazi bütövlüyü əsasında həll edilə bilər. Azərbaycan Respublikasının Konstitusiyasını pozan və beynəlxalq hüquqla uyğun olmayan fəaliyyət münaqişənin sülh yolu ilə həlli yolu ola bilməz. Güc tətbiq etməklə ərazinin işğalı beynəlxalq ictimaiyyət tərəfindən heç zaman qanuni tanına bilməz. Azərbaycan heç zaman öz ərazilərinin işğalı ilə barışmayacaq. Azərbaycan ərazilərinin hərbi işğalı həll yolu deyil və heç zaman Ermənistanın arzuladığı siyasi nəticəni verə bilməz".

Bəyanatda eyni zamanda qeyd olunur ki, Azərbaycan beynəlxalq cəmiyyətin bütün üzvlərini beynəlxalq hüquqdan irəli gələn öhdəliklərinə uyğun olaraq, Azərbaycan ərazilərinin işğalı nəticəsində yaranmış vəziyyətin qanuniliyini tanımamağa və bu vəziyyətin saxlanılmasına yardım və kömək göstərməməyə və bu istiqamətdə təsirli tədbirlər görməyə çağırır: "Ermənistan öz xalqı və beynəlxalq ictimaiyyəti aldatmaq məqsədi daşıyan lüzumsuz cəhdlərindən əl çəkməli, ilhaqçılıq və etnik təmizləmə siyasətinə son qoymalı, münaqişənin nizamlanması prosesində konstruktiv şəkildə iştirak etməli və beynəlxalq öhdəliklərinə əməl etməlidir".

XİN-in bəyanatında bildirilir ki, Ermənistan silahlı qüvvələrinin qeyri-qanuni mövcudluğunun davam etməsi və Azərbaycanın işğal olunmuş ərazilərində qanunsuz fəaliyyətlərlə əlaqədar beynəlxalq səviyyədə tanınmış sərhədləri daxilində suverenliyi və ərazi bütövlüyünü qorumaq üçün Azərbaycannın atmaq məcburiyyətində qala biləcəyi addımların istənilən nəticələrinin məsuliyyəti tam şəkildə Ermənistanın üzərinə düşəcək.

Məsələyə münasibət bildirən Beynəlxalq Avrasiya Mətbuat Fondunun rəhbəri Umud Rəhimoğlu deyib ki, belə "seçkilər" heç bir beynəlxalq hüquqa söykənmir. Onun sözlərinə görə, Azərbaycan Xarici İşlər Nazirliyinin belə bir bəyanat verməsinə ehtiyac var idi: "Tək bu "seçkilər" deyil, zaman-zaman belə "seçkilər"in keçirilməsinin şahidi oluruq.

Hətta bir neçə gün bundan əvvəl rus əsilli olan iş adamının Alyona adlı xanımı Şuşada moda sərgisi keçirmişdi. Bunların hamısı ictimaiyyət daxilində müsbət xarakterli görüntü yaratmaq addımlardır. Guya Qarabağdakı cəmiyyətdə proseslərin gedir, o cümlədən burada "demokratik" əhval-ruhiyyə var. Amma əfsuslar olsun ki, bu işlərə rəvac verən Ermənistan hökuməti öz niyyətini həyata keçirmək üçün beynəlxalq hüquqa zidd hərəkət edir. Bu da işğalçı bir dövlətin sülhə, əmin-amanlığa, xüsusilə sülh prosesinə vurduğu böyük bir zərbədir. Yəni, daha çox beynəlxalq aləmdə Qarabağ məsələsində sülhün tərəfdarı olmasından dəm vuran Ermənistan bu cür işlərə rəvac verməklə prosesin uzadılmasına və beynəlxalq ictimaiyyətdə bir görüntü yaratmağa çalışır.

Bir vətəndaş cəmiyyəti təmsilçisi olaraq, bu cür "seçki"lərin, tədbirlərin həyata keçirilməsini qətiyyətlə pisləyirəm. O cümlədən BMT-nin qəbul etdiyi qətnamələrin yerinə yetirilməsi istiqamətində beynəlxalq qurumların daha qətiyyətli və ciddi tədbirlərin görməsini istərdim".

BƏXTİYAR