"Bu oyun çox vacib idi" - Qurban Qurbanov

"Maraqlı oyun alındı. Düzü, futbolçular bir az çətinlik çəkirdilər".

Teleqraf.com-un məlumatına görə, bu fikirləri "Qarabağ"ın baş məqçisi Qurban Qurbanov klubun rəsmi yutub kanalına açıqlamasında Avstriya toplanışında Bolqarıstanın MOİK (Sofiya) komandasını 1:0 hesabı ilə məğlub etdikləri yoxlama matçı barədə danışarkən deyib.

49 yaşlı mütəxəssis matçdan öncə heyətlə bağlı problemlərinin olduğunu bildirib: "Bu, rəqibin Asvtriyada 4-cü oyunu idi. Onların hazırlığı bizdən daha yaxşı idi. Heyətimizdə problemlər var idi. Bəzilərini qoruduq, meydanda onlardan istifadə edə bilmədik".

Qurbanovun sözlərinə görə, bu oyun onun üçün çox vacib idi: "Futbolçuların ilk matçda həm sürəti, həm də mübarizəni hiss etmələrini istəyirdim. Bu mənada MOİK tam istədiyimiz rəqib idi. İlk hissədə texniki səhvlərimiz çox oldu. Bu da başadüşüləndir. Sonadək mübarizə oldu, oyunun tempi düşmədi. Çətinliklərimiz var, bu qarşılaşmada da hiss olundu. İnanıram ki, yaxın zamanlarda bunları aradan qaldıracağıq. Oyunu qələbə ilə bitirmək tam yerinə düşdü".