“Əlinizdə imkan olanda nə etdiniz?” – Sərt təpki

“Əli Kərimli və ətrafının hakimiyyətin atdığı addımlarla bağlı kampaniya təşkil edib bunları “öz əməyinin nəticəsi” kimi göstərməyə çalışması çox komikdir. Onlar bir illik hakimiyyətləri dövründə Azərbaycan xalqının, bu torpağın, dövlətin, millətin başına gətirdikləri oyunları yadlarına salsınlar. Yəqin bu, özlərinin xatirələrindən əbədi çıxmayacaq. Çox güman, manipulyasiya etməklə özlərini təmizə çıxarmağa çalışır, şou düzəltməklə gündəmdə qalmaq istəyirlər”.

Bu sözləri Teleqraf.com-a açıqlamasında Yeni Azərbaycan Partiyasının Siyasi Şurasının üzvü, “İki sahil” qəzetinin baş redaktoru Vüqar Rəhimzadə deyib.

Onun sözlərinə görə, ölkə başçısının atdığı addımlar insan amilinə söykənən, insanların yaxşı yaşamasına hesablanan addımlardır:

“Azərbaycan Prezidenti İlham Əliyev prezident seçiləndə açıqlamışdı ki, mən hər bir Azərbaycan vətəndaşının prezidenti olacağam. İndiyədək regionların sosial inkişafı ilə bağlı üç dövlət proqramı qəbul edilib. Sonuncu qərarları xüsusilə qeyd etmək istərdim, tələbələrin təqaüdünün artırılması adi sərəncam deyil, on minlərlə insana dəstəkdir, gənclərimizə stimuldur”.

Vüqar Rəhimzadə qeyd edib ki, çoxmərtəbəli binaların istismarına icazə verilməsinin sadələşdirilməsi haqqında dövlət başçısının fərmanı tarixi hadisə, Azərbaycan vətəndaşlarına xidmət edən qərardır:

“Şəhid ailələri, əlilliyi olan şəxslərlə bağlı verilən qərarlar da daxil olmaqla onlarla belə addımlar sadalamaq olar ki, vətəndaşlarımıza göstərilən diqqəti təcəssüm etdirir. Əli Kərimli və yan-yörəsindəki insanlar nə edirlər?! Yalnız Azərbaycanın əleyhinə işləyir, vətəndaşlarımızın əleyhinə danışır, bu cəmiyyətə ziyan vurmaqla məşğuldurlar. Əli Kərimli və ətrafı anti-Azərbaycan və erməni lobbisinin missionerləridir. Onlar orada, Əli Kərimli də Azərbaycanda iyrənc və çirkin əməllərlə məşğuldur. Hesab edirəm ki, onların birillik hakimiyyəti dövrü Azərbaycan xalqının həmişəlik yadında qalacaq. Onların kimliyi, yaramaz əməlləri gözümüz qarşısında canlanır, insanların çörəklə sınağa çəkilməsi, iqtisadiyyatımızın məhvinin, xarici siyasətimizin alt-üst edilməsinin, insanlara bədnam münasibətin, jurnalistlərin döyülüb-söyülməsi, televiziyalara, canlı efirə basqıların şahidi olmuşuq. Yüzlərlə belə fakt sadalamaq olar ki, birillik hakimiyyətləri dövrü onların cizgilərini, obrazlarını ortaya qoymağa kifayət edər. Əlinizdə imkan olanda nə etdiniz, ay yaramazlar? Bu xalqa yalnız qənim kəsildiniz, xalqa zərbə vurmaqla məşğul oldunuz, ay radikallar, Əli Kərimli və ətrafı!”

Vüqar Rəhimzadə bildirib ki, “Milli Şura”nın əhalinin rifahının yüksəldilməsi ilə bağlı hakimiyyətin atacağı addımlara dair sızan məlumatları əlində bayraq edib siyasi xal qazanmağa cəhd göstərməsi gülüncdür:

“Bu da o hadisələri unutdurmaq üçün siyasi manevrdir. Azərbaycan xalqı kimin kim olduğunu çox yaxşı bilir, heç kim heç nəyi unutmayıb.

Prezident İlham Əliyev tək bu gün yox, həmişə bu millətin, bu dövlətin yanındadır. Nə qərarlar qəbul edilirsə, hansı sərəncamlar imzalanırsa, hamısı vətəndaşlarımıza xidmət nümunəsini ortaya qoyur. Su və qaz xətlərinin çəkilişi, yeni aeroportların salınması, məktəblərin, səhiyyə müəssisələrinin tikintisi, görülən işlər insanların həyat şəraitinin yaxşılaşmasına xidmət göstərir. Cənab prezidentin qarşıya qoyduğu ən böyük hədəflərdən biri də odur ki, dünyada ən yaxşı yaşayan vətəndaşlar Azərbaycan vətəndaşları olmalıdır”.