Bakı ilə Amsterdam məsləhətləşdi

Bakıda Azərbaycan və Niderland xarici işlər nazirlikləri arasında siyasi məsləhətləşmələrin növbəti mərhələsi baş tutub. Nümayəndə heyətlərinə Azərbaycan tərəfdən xarici işlər nazirinin müavini Ramiz Həsənov, Niderland tərəfdən isə XİN-in siyasi məsələlər üzrə baş direktorunun müavini Piter Yan Kleyveq de Zvan rəhbərlik edib.

XİN-in mətbuat xidmətindən Teleqraf.com-a verilən məlumata görə, məsləhətləşmələr zamanı iki ölkə arasında siyasi dialoqun yüksək səviyyədə olduğu qeyd edilib, əlaqələrin hazırkı vəziyyəti təhlil olunub və əməkdaşlıq perspektivləri barədə fikir mübadiləsi aparılıb. Dövlət və hökumət başçıları arasındakı dialoqun, nazirlər səviyyəsində görüşlərin, habelə parlamentlərarası təmasların əməkdaşlığın genişləndirilməsi baxımından müstəsna rol oynadığı vurğulanıb.

Görüşdə Ermənistan-Azərbaycan, Dağlıq Qarabağ münaqişəsi mövzusunda fikir mübadiləsi aparılıb, problemin həllinin yalnız ölkəmizin suverenliyi və ərazi bütövlüyü əsasında mümkün olduğu diqqətə çatdırılıb və Azərbaycanın ərazi bütövlüyünə verdiyi birmənalı dəstəyə görə Niderland tərəfinə təşəkkür edilib.

Tərəflər, həmçinin regionda Azərbaycanın təşəbbüsü və iştirakı ilə həyata keçirilən enerji və nəqliyyat layihələrində Niderlandın bir sıra şirkətlərinin uğurla fəaliyyət göstərdiyini qeyd edərək, qeyri-neft sektorunda, xüsusilə kənd təsərrüfatı sahəsində əlaqələrin genişləndirilməsi imkanlarını müzakirə edib, habelə təhsil, elm və mədəniyyət sahələrində təmasların iki ölkə xalqlarının daha da yaxınlaşması baxımından vacibliyini vurğulayıblar.

Bundan əlavə, iki ölkə arasında BMT, ATƏT, NATO, Avropa İttifaqı, Avropa Şurası və digər beynəlxalq təşkilatlar çərçivəsində qarşılıqlı faydalı əməkdaşlıq yüksək dəyərləndirilib, eləcə də qarşılıqlı maraq doğuran digər regional və beynəlxalq məsələlər ətrafında fikir mübadiləsi aparılıb.