16 Sentyabr 15:25
477

“Bu gün bir daha əmin oldum ki, biz azərbaycanlılar zamanın tələb etdiyi ağıllı qərarları bir neçə il gecikməklə aldığımıza görə uduzmuşuq. Dərslərin sentyabrın 1-dən başlaması sadəcə zərurətdir. Qoy iyunun 15-dək davam etsin, ancaq buradan da əlavə 15 gün qazanmış olarıq. Onsuz da müəllimlərin hamısı avqustun sonlarından məktəbdə işə cəlb olunurlar”.

Teleqraf.com xəbər verir ki, bunu deputat Fazil Mustafa deyib.

Deputatın fikrincə, bu məsələdə arqument axtarmağa gərək yoxdur:

“Qarabağ savaşında məğlub olmuş, milyona yaxın qaçqını olan bir xalqın övladlarının fasiləsiz təhsildən başqa nicatı yoxdur. Hər il itirdiyimiz bu 15-16 gün üst-üstə yığılanda az vaxt etmir. İllərdir xəbərdarlıq etdiyim cəhalət, xurafat dalğası bu ilin mənzərəsini seyr edən çoxlarını artıq rahatsız etməyə başlayıb. Cəhalətin də yeganə alternativi mümkün qədər çox vaxtın təhsilə sərf olunmasıdır. “Bilik günü” ifadəsi də bu vaxt dəyişiminə görə saxta görünür.

Azərbaycan insanı üçün hər gün bilik günü olmalıdır, biz bu cür vaxt itikiləri ilə dünyayla ayaqlaşmada çətinlik çəkəcəyik. Məktəblərdə Novruz Bayramı tətilini də 3 gündən artıq etmək vaxt itkisidir. Bu eyni zamanda alı təhsil müəssisələrinə, kolleclərə də aiddir. Tam məsuliyyətimlə deyirəm, bu 15 gün gecikmə, ardınca da bir həftə adoptasiya ilə bağlı boşuna keçirilən vaxt təhsilin keyfiyyətinə də pis təsir göstərir”.


Müəllif: Mənsur Rəğbətoğlu