“Vardanyan layihəsi” belə pozuldu: Oyun başa çatdı – Kritik gəlişmə

1988-ci ilin mitinqlərində ermənilər deyirdilər ki, Ermənistanda bir nəfər də türk, azərbaycanlı qalmayıb. 200 mindən yuxarı azərbaycanlını erməni şovinistlər həmin vaxt 10-15 gün müddətinə öz yurd-yuvalarından qovdular. Bunu özləri üçün az qala tarixi bir “qələbə” hesab edirdilər. Təbii ki, bu faşist ideologiyasının tərkib hissəsi idi. Amma proseslərin üzərindən 30-35 il keçdikdən sonra bunun onlar üçün nələrlə nəticələndiyini gördülər. Çünki ermənilər anlamadılar ki, mədəni müxtəliflik elə ayrı-ayrı xalqların fonunda yaranır.

Bunu Teleqraf.com-a politoloq Zərdüşt Əlizadə deyib.

Onun fikrincə, daha sonra Azərbaycan ərazisində separatizmi qızışdıran erməni millətçiləri bunun necə nəticələnəcəyini də bilmirdilər:

“Bu gün Azərbaycan ərazisində özünü qondarma rejimin bir ünsürü kimi təqdim edən, burada “mən də varam” deyən Ruben Vardanyan həbs edildi. Vardanyanın separatizmin başlanğıcında iştirakı olmayıb. O, daha çox çirkli pulların Qərbə daşınması, yuyulması ilə ad çıxarıb. Hətta onun Rusiya və Qərbdə olan hakim zümrələrlə böyük əlaqələrinin olduğu bildirilir”.

Politoloqa görə, Vardanyanın birdən-birə Ermənistanda peyda olması da qaranlıq qalan suallardan idi:

“O, təhsil sahəsində bir qədər özünü göstərməyə başladı. Bir müddət sonra isə qanunsuz olaraq Azərbaycan ərazisinə, Qarabağa gəldi. Evi, ailəsi Londonda ola-ola o Qarabağda qondarma rejim naminə çalışacağını açıqlamışdı. Hətta bir çoxlarını onun bu davranışları şirnikləşdirmişdi və aldanmışdılar. Amma bu oyun idi”.

Zərdüşt Əlizadə hesab edir ki, Azərbaycan düzgün olaraq Vardanyan üzərindən oynanılan bu oyunların məqsədini bildiyi üçün adekvat tədbirlər gördü:

“İlk andaca Azərbaycan tərəfi bəyanat verdi ki, Vardanyan Qarabağ vətəndaşı deyil. O da qondarma rejimdə olan vəzifəsi ilə bir şey edə bilməyəcəyini anladı, amma yenə də Qarabağda qalmağa üstünlük verdi. Məqsədi ehtimalları dəyərləndirmək idi. Bunun üçün də orada absurd bəyanatlar verməyə başladı. “Müqəddəratı təyinetmə”, “status”, “müstəqillik” kimi mənasız fikirlər, sayıqlamalar etdi. İndi də bu iddialarına görə Azərbaycan hüquq sistemi qarşısında cavab verməli olur. Sadəcə olaraq o, siyasi oyunların piyadası olduğunu anlamalı idi. Məsələ bu qədər sadədir”.