27 Noyabr 2023 19:20
293
12 Punto 14 Punto 16 Punto 18 Punto

Beynəlxalq münasibətlər sistemində çətin və mürəkkəb proseslərin getdiyi bir vaxtda ölkəmizin öz mövqeyini gücləndirməsi, həmçinin, geopolitik mərkəzə çevrilməsi Azərbaycanın qlobal siyasi güc olaraq nüfuzunu hər gün daha çox artırır. Dünyanın aparıcı dövlətlərinin Azərbaycanla sıx strateji əlaqələr və əməkdaşlıqlar qurmaqda maraqlı olmaları bunun bariz nümunəsidir. Bu gün Azərbaycan dünyanın bir çox dövlətləri, aparıcı beynəlxalq təşkilatları ilə sıx əməkdaşlıq edir. Azərbaycan dünyada qlobal təşəbbüslərin və beynəlxalq tədbirlərin təşkilatçısı kimi günü-gündən nüfuzunu daha da artırır. Noyabr ayının 24-də Heydər Əliyev Mərkəzində BMT-nin Mərkəzi Asiya Ölkələrinin İqtisadiyyatları üçün Xüsusi Proqramının – SPECA-nın iştirakçı ölkələrinin dövlət və hökumət başçılarının Zirvə görüşünün keçirilməsi bunun əyani təzahürlərindən biridir. BMT tərəfindən 1998-ci ildə yaradılmış SPECA Mərkəzi Asiya ölkələrində iqtisadiyyatın davamlı inkişafını və qarşılıqlı əlaqələrin gücləndirilməsini təşviq edən iqtisadi platformadır. Azərbaycan, Türkmənistan, Qazaxıstan, Qırğızıstan, Özbəkistan, Tacikistan və Əfqanıstanın üzv olduğu proqramın fəaliyyətinə nəzər salanda görürük ki, Azərbaycan xüsusilə son illərdə bu ölkələrlə əməkdaşlığın daha da inkişafı istiqamətində çoxşaxəli fəaliyyət həyata keçirir. Həmçinin, SPECA-ya üzv olan ölkələri bir-birinə tarixi bağlar birləşdirir. Bütün bunları nəzərə alaraq, deməliyik ki, SPECA-nın Zirvə görüşünün keçirilməsi dünyada baş verən iqtisadi, siyasi gərginliklər fonunda olduqca mühüm əhəmiyyət kəsb edir.

Teleqraf.com xəbər verir ki, bu fikirləri saytımıza açıqlamasında Milli Məclisin üzvü Tamam Cəfərova deyib.

Deputat bildirib ki, Azərbaycan Mərkəzi Asiya ölkələri ilə əməkdaşlığa böyük önəm verir. Prezident İlham Əliyev ölkəmizin bu regiondakı dövlətlərlə əlaqələrini belə xarakterizə edib: "Azərbaycanı və Mərkəzi Asiya ölkələrini xalqlarımızın çoxəsrlik qardaşlıq münasibətləri bağlayır. Ortaq mədəni köklər dövlətlərarası əlaqələrin möhkəm bünövrəsini təşkil edir. Otuz ildən artıqdır ki, biz müstəqil dövlətlər kimi həm ikitərəfli, həm çoxtərəfli formatda fəal şəkildə qarşılıqlı fəaliyyət aparırıq, bir-birimizin müstəqilliyini, suverenliyini və ərazi bütövlüyünü dəstəkləyirik, iqtisadi əlaqələri fəal şəkildə inkişaf etdiririk. Mərkəzi Asiya və Azərbaycan artan iqtisadiyyatı, demoqrafiyası və geosiyasi potensialı ilə dünya siyasətində strateji əhəmiyyətə malik olan vahid tarixi-mədəni coğrafi regiondur". SPECA proqramı çərçivəsində də ölkələrimiz arasında əməkdaşlıq uğurla inkişaf edir. Hazırda Azərbaycan SPECA-ya sədrlik edir. Cari il BMT-nin Mərkəzi Asiya Ölkələrinin İqtisadiyyatları üçün Xüsusi Proqramının (SPECA) 25-ci ildönümüdür. İyirmi beş il ərzində ölkələrimiz arasında hərtərəfli əlaqələr uğurla inkişaf edib, ancaq SPECA-ya üzv dövlətlərin Zirvə görüşü ilk dəfə keçirilir. Zirvə görüşünün keçirilməsi ilə əlaqədar Azərbaycanın təşəbbüsü Mərkəzi Asiya ölkələrinin rəhbərləri tərəfindən dəstəklənmişdir.

Millət vəkili Tamam Cəfərova xüsusilə vurğulayıb ki, bu gün dünyanın müxtəlif bölgələrində müharibələr, münaqişələr, siyasi, iqtisadi böhranlar geniş vüsət alıb. SPECA-ya üzv ölkələrində isə sülh, sabitlik, əmin-amanlıq hökm sürür, davamlı inkişaf, quruculuq prosesləri uğurla həyata keçirilir.SPECA-ya üzv ölkələr arasında bərabərhüquqlu tərəfdaşlıq əlaqələrinin qurulması bu ölkələr arasında münasibətlərin inkişafında önəmli amildir. Bunun əsas səbəbi isə odur ki, SPECA-ya üzv dövlətlər əsl müstəqil ölkələrdir, çünki müstəqil xarici və daxili siyasət aparırlar. Ermənistan kimi ölkəyə, sözün əsl mənasında, müstəqil ölkə demək olmaz. Belə ölkələrin siyasəti xalqlarının iradəsinə əsaslanmır, onların taleyi xarici sponsorların əlindədir.

Müstəqilliyimizin ilk illərində ölkəmizin beynəlxalq səviyyədə tanınan ərazilərinin təxminən 20 faizi Ermənistan tərəfindən işğal edilmişdi. Ermənistanın həyata keçirdiyi etnik təmizləmə siyasəti nəticəsində bir milyondan artıq azərbaycanlı öz dədə-baba yurdlarından qovulmuşdur. Otuz ilə yaxın aparılan danışıqlar heç bir nəticə verməmişdir. Çünki Ermənistanın məqsədi işğalı və status-kvonu qoruyub saxlamaq idi. Qeyd edək ki, 2019-cu ildə Ermənistanın baş nazirinin o vaxt işğal altında olan Xankəndi şəhərində “Qarabağ Ermənistandır və nöqtə” açıqlaması danışıqlar prosesini tamamilə məhv etdi. Ermənistan baş nazirinin destruktiv mövqeyi danışıqlar prosesinin davam etdirilməsinin mümkünsüz olduğunu göstərdi. 2020-ci ilin noyabr ayında Azərbaycan xalqı öz tarixinin ən parlaq Qələbəsinə imza atdı. Azərbaycan 44 günlük Vətən müharibəsində Ermənistanı məğlub etdi və işğala son qoydu. BMT Təhlükəsizlik Şurasının 1993-cü ildə qəbul etdiyi və 27 il kağız üzərində qalmış dörd qətnaməsinin icrasını özümüz təmin etdik. Şübhəsiz ki, Azərbaycan özünün suveren əraziləri daxilində “boz zona”nın qalmasına imkan verə bilməzdi. Nəticədə Azərbaycan cəmi bir gün davam edən lokal antiterror tədbirləri nəticəsində 1992-ci ildə xalqımıza qarşı soyqırımının törədildiyi Xocalı şəhəri də daxil olmaqla, bütün əraziləri üzərində suverenliyini tam bərpa etdi və təcavüzkar separatizmə son qoydu. Hazırda isə “Böyük Qayıdış” proqramı uğurla davam etdirilir. Keçmiş məcburi köçkünlər “Böyük Qayıdış” Proqramı çərçivəsində öz dədə-baba yurdlarına qayıdırlar. 2026-cı ilin sonuna qədər 140 min keçmiş məcburi köçkün öz doğma evlərinə qayıdacaq. Şübhəsiz ki, ötən üç il ərzində Qarabağ və Şərqi ZƏngəzurda Azərbaycan dövlətinin öz imkanları ilə həyata keçirdiyi ardıcıl quruculuq işləri bütün dünyada heyrətlə izlənilir. Bütün bu uğurlar cənab Prezident İlham Əliyevin rəhbərliyi altında həyata keçirilən məqsədyönlü, ardıcıl siyasətin məntiqi nəticəsidir. Millət vəkili Tamam Cəfərova belə deyib.


Müəllif: Teleqraf.com