Bayraq meydanının sabiq rəisinin məhkəməsində zərərçəkənlər ifadə verdi

Bu gün Bakı Ağır Cinayətlər Məhkəməsində Dövlət Bayrağı Meydanı Kompleksinin sabiq rəisi Rəşad Məmmədov və digərlərin cinayət işi üzrə məhkəmə prosesi davam etdirilib.

Teleqraf.com xəbər verir ki, hakim Əlövsət Abbasovun sədrliyi ilə keçirilən prosesdə zərərçəkmiş şəxs qismində Zabil Salmanov ifadə verib.

O, təqsirləndirilən şəxslərə qarşı hər hansı şikayətinin və tələbinin olmadığını, onların azadlığa buraxılmasını istədiyini deyib.

Zabil Salmanov bildirib ki, ona dəymiş maddi ziyan ödənilib: “Mən həmin yeri satmaq istəmirdim. Sonradan mənə təzyiqlər oldu və mən onlarınt əklifləri ilə razılaşmalı oldum. Mən obyekti 6 milyondan baha satmaq istəydirim. Onlar isə dedilər ki, oranın alınmasına 4 milyon 700 min pul ayrılıb”.

Z. Salamnov danıışıqlar başlayandan 9 ay sonra Rəşad Məmmədovu tanıdğını da bildirib.

Proses iyunun 17-də davam etdiriləcək.

Qeyd edək ki, Dövlət Bayrağı Meydanı Kompleksinin sabiq sədri Rəşad Məmmədov, onun təqsirli bilindiyi işlə əlaqədar İsfəndiyar İsfəndiyarov və Arzu Məmmədov həbs edilib. Dələduzluqda təqsirləndirilən həmin şəxslərin barələrində həbs-qətimkan tədbiri seçilib. Bir müddət əvvəl həmin cinayət işi üzrə zərərçəkmiş şəxs kimi tanınan Zabil Salmanov ərizə ilə istintaq orqanına müraciət edib və təqsirləndirilən şəxslərə qarşı hər hansı şikayətinin olmadığını bildirib.

Martın 4-də A. Məmmədovun barəsində seçilmiş həbs-qətimkan tədbirinin dəyişdirilməsi barədə Səbail rayon Məhkəməsinə etdiyi müraciətə baxılıb. Müraciətdə o, həyat yoldaşının ağır xəstəlikdən əziyyət çəkdiyini qeyd edib. Səbail rayon Məhkəməsi onun xahişini nəzərə alıb və barəsində seçilmiş həbs-qətimkan tədbirini dəyişdirib. Ondan başqa yerə getməmə haqqında iltizam alınıb və azadlığa buraxılıb.

Hacı Zeynalov