Saatlıda evləri qarət edən narkoman tutuldu

Saatlı rayonunda evlərdən oğurluq edən narkotik istifadəçisi həbs edilib.

Teleqraf.com xəbər verir ki, Saatlı rayon polis şöbəsi əməkdaşlarının keçirdiyi əməliyyat nəticəsində Qıraqlı kənd sakini Əfqan Quliyev tutulub.

Əvvəllər də məhkumluq həyatı yaşayan Əfqan Quliyevin evinə baxış keçirilib. Baxış zamanı isə evdən 406 qram marixuana aşkar edilərək götürülüb.

Araşdırma zamanı məlum olub ki, Əfqan Quliyev müxtəlif vaxtlarda ayrı-ayrı evləri, hətta öz qardaşlarına məxsus mənzilləri talayıb. O, 10-a yaxın evdən xeyli miqdarda pul, 20 min manat dəyərində qızıl və digər əşyalar oğurlayıb.

Əfqan Quliyev oğurladığı qiymətli əşyaları Sabirabad rayonunda xırda ticarətlə məşğul olan şəxslərə satıb.
Faktlarla bağlı cinayət işi başlayıb.

Hacı Zeynalov