Abşeronda və Qaradağda orta məktəblər qarət edildi

Abşeron rayonunda orta məktəbdən oğurluq edilib. Teleqraf.com xəbər verir ki, hadisə Saray qəsəbəsindəki 2 saylı orta məktəbdə qeydə alınıb. Orta məktəbin kimya otağından 3 ədəd kompyuter oğurlanıb.

Abşeron rayon Polis İdarəsi əməkdaşlarının həyata keçirdikləri əməliyyat-axtarış tədbirləri nəticəsində cinayəti törətməkdə şübhəli bilinən qəsəbə sakinləri Bəhram Sevdimalıyev, Nicat İmanov, Balakən rayon sakini Vüsal Məsimov və Bərdə rayon sakini Səbuhi İmanov tutulublar.

Onların qəsəbə ərazisində 2 mağazadan pul, tütün məmulatı və sərinləşdirici içkilər oğurlamaları da müəyyən edilib.

Orta məktəbdən oğurluq hadisəsi Qaradağ rayonunun Sahil qəsəbəsində də qeydə alınıb. Naməlum şəxs və ya şəxslər Emin Quliyev küçəsi, 50 ünvanında yerləşən 273 saylı orta məktəbin plastik pəncərəsini sındıraraq içəriyə daxil olublar.

Daha sonra məktəbin İnformatika fənni otağının qapılarını sındıraraq, içəridən 5 ədəd monitor, 3 ədəd prosessor, 3 ədəd klaviatura və 1 ədəd noutbuk oğurlanıb.

Hər iki faktla bağlı cinayət işi başlanıb.

Hacı Zeynalov