İmişlidə mağazadan 3 kilo qızıl oğurlandı – polis əməliyyat keçirdi

İmişli rayonunda mağazadan külli miqdarda qızıl oğurlanıb. Teleqraf.com xəbər verir ki, hadisə ötən il noyabrın 16-da rayon ərazisindəki qızıl mağazalarından birində qeydə alınıb.

Həmin gün mağazadan 3 kiloqram qızıl əşyaları oğurlanıb. Mağaza sahibi baş verən oğurluq hadisəsi ilə bağlı İmişli rayon polis şöbəsibə müraciət edib.

Polis əməkdaşlarının keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən Şahverdili kənd sakini İsmayıl Əmirov tutulub, daha 1 nəfər isə müəyyən edilib.

İsmayıl Əmirovun həyətinə baxış zamanı oradan torpağa basdırdığı 1 kiloqram 488 qram (299) adda qızıl əşyalar maddi sübut kimi götürülüb.

Məlumata görə, oğurluğu törədənlər həmin qızılın yarısını sataraq xərcləyiblər. Elə qızılın satılması polislərin izə düşməsinə səbəb olub.

Yanvarın 19-da İsmayıl Əmirov qızıldan satan zaman həbs edilib.

Cinayətin digər iştirakçısının adı istintaq sirri olduğu üçün açıqlanmır.

Faktla bağlı cinayət işi başlanıb.

Hacı Zeynalov