12 İyul 2017 10:14
767

Bakı şəhər Baş Polis İdarəsi və şəhər prokurorluğu Nərimanov rayonu ərazisində törədilən qətllə bağlı birgə məlumat yayıb.

Teleqraf.com xəbər verir ki, iyulun 10-da saat 11 radələrində Nərimanov rayonu, A.Nemətulla küçəsi 82 saylı ünvanda 1951-ci il təvəllüdlü Barışov Yuriy Petroviçin üzərində zorakılıqla qətlə yetirilməyə xarakterik xəsarətləri olan meyiti aşkarlanıb.

Həmin faktla bağlı Nərimanov rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

İstintaq hərəkətləri və əməliyyat-axtarış tədbirləri nəticəsində cinayətin əvvəllər quldurluq cinayətinə görə məhkum olunmuş Akayev Hüseyn Ramazanoviç tərəfindən törədilməsinə kifayət qədər şübhələr olub. O, şübhəli şəxs qismində tutularaq istintaq cəlb edilib.

Hazırda cinayət işi üzrə Bakı şəhər prokurorluğunun İstintaq idarəsində istintaq tədbirləri davam etdirilir.


Müəllif: Hacı Zeynalov