"Beynəlxalq Bank"la bağlı daha bir məhkəmə

Bu gün Bakı Ağır Cinayətlər Məhkəməsində Beynəlxalq Bank ASC-nin nəzdində fəaliyyət göstərən Azərikard MMC-nin Maliyyə Menecmenti Departamentinin dələduzluqda təqsirləndirilən direktoru Gülşən Əliyeva və sürücüsü Bayram Şəfiyevin cinayət işi üzrə məhkəmə istintaqı başlayıb.

Teleqraf.com-un xəbərinə görə, hakim Şəkər Məmmədovanın sədrliyi ilə baş tutan prosesdə prokuror ittiham aktını elan edib. Gülşən Əliyeva elan olunmuş ittiham üzrə özünü qismən təqsirli bilsə də, Bayram Şəfiyev günahsız olduğunu deyib.

Proses sentyabrın 20-dək təxirə salınıb.

İttihama görə, Bayram Şəfiyev özgənin əmlakını ələ keçirmək məqsədilə, 2011-ci il dekabr ayının ortalarında Gülşən Əliyeva ilə əlbir olaraq, tanışı İbrahim Cəfərovla görüşüb, G. Əliyevanı ona "Beynəlxalq Bank"ın baş mühasibi kimi təqdim edərək, sonuncunu bankda adına açılacaq müddətli əmanət (depozit) hesabına qoyulan puldan əlavə 5 faiz gəlir əldə edəcəyinə inandırıb. Bu yolla ondan 20 min manat məbləğində pul alaraq, guya bankdakı hesaba qoyacağını deyərək, onu aldadıb. Pulu isə G. Əliyevaya verib.

G. Əliyeva daha əvvəl bankın baş mühasibi olub.