Bir gündə üç rayonda xüsusi – Əməliyyat

Ötən gün 4 kiloqrama yaxın yüksək təsiredici xüsusiyyətə malik narkotik vasitə qanunsuz dövriyyədən çıxarılıb.

Daxili İşlər Nazirliyinin mətbuat xidmətindən Teleqraf.com-a verilən məlumata görə, Sabunçu rayon Polis İdarəsi 12-ci polis bölməsi əməkdaşlarının əməliyyat tədbirləri nəticəsində narkotik vasitələrin qanunsuz dövriyyəsində şübhəli bilinən şəxs saxlanılıb.

Araşdırmalarla onun Ramana sakini, əvvəllər məhkumluq həyatı yaşamış Əli Həmidov olduğu aydınlaşıb. Baxış zamanı onun üzərindən heroin aşkar edilib.

Əməliyyat-axtarış tədbirləri ilə Əli Həmidovun yaşadığı evin yaxınlığında kolluqda gizlətdiyi 2 kiloqramdan artıq heroin də aşkar edilərək götürülüb.

Bundan başqa, Qaradağ rayon Polis İdarəsi əməkdaşlarının əməliyyat tədbirləri nəticəsində Qobustan qəsəbə sakini, əvvəllər məhkum olunmuş Arif İsmayılov saxlanılıb. Ondan 1 kiloqram 640 qram heroin götürülüb.

Masallı rayon polis şöbəsinin əməkdaşları şəhər sakini, əvvəllər məhkum olunmuş Zöhrab Əzizovdan marixuana götürüblər.

Onun evindən əlavə olaraq 125 qram marixuana, həmçinin lüləsi və qundağı kəsilmiş, nömrəsi silinmiş “İJ-16” markalı tüfəng də aşkar edilərək götürülüb.

Faktlarla bağlı cinayət işləri başlanıb.