13 İyun 13:16

Bakıda 1 milyon 200 min manatlıq dələduzluq etməkdə təqsirli bilinən Hicran Allahverdiyevanın cinayət işi üzrə yenidən məhkəmə prosesi başlayıb.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Azad Məcidovun sədrliyi ilə keçirilən prosesdə psixiatriya ekspertizasının rəyi elan olunub.

Məlum olub ki, Hicran Allahverdiyeva cinayəti törədən zaman anlaqlı olub.

Növbəti proses iyunun 20-də davam edəcək.

İttihama görə, Hicran Allahverdiyeva bir qrup vətəndaşın etibarindan sui-istifadə edərək, şirkət yaratmaq adı ilə onların külli miqdarda pullarını ələ keçirib.

Cinayət işi üzrə 6 nəfər zərərçəkmiş qismində tanınıb. Onlara ümumilikdə 1 milyon 200 min manat miqdarında ziyan dəyib.

İstintaq orqanı tərəfindən Hicran Allahverdiyevanın barəsində Cinayət Məcəlləsinin 178.3.2-ci (külli miqdarda ziyan vurmaqla dələduzluq törətmək) maddəsi ilə ittiham elan edilib.

Bir müddət əvvəl Bakı Ağır Cinayətlər Məhkəməsində hakim Azad Məcidovun icraatında olan prosesdə Hicran Allahverdiyeva ilə bağlı hökm elan edilib.

Hökmə əsasən, Hicran Abdullayevanın cinayəti törədərkən anlaqsız vəziyyətdə olduğu qənaətinə gəlib. Onun barəsində 1 saylı Respublika Psixiatriya Xəstəxanasında məcburi müalicə təyin edilib.

Zərərçəkmiş şəxslərin hökmdən verdiyi şikayətə Bakı Apelyasiya Məhkəməsində hakim Faiq Qasımovun icraatında baxılıb. Məhkəmə araşdırması zamanı yenidən psixi ekspertiza keçirilib və Hicran Allahverdiyevanın sağalması barədə rəy verilib.

Bundan sonra, hakim Faiq Qasımovun sədrlik etdiyi kollegiya birinci instansiya məhkəməsinin hökmünün ləğv edilməsi barədə qərar elan edib.

Qərarda işin yenidən araşdırılması üçün Baş Prokurorluğun İstintaq İdarəsinə göndərilməsi tələb edilib. Qərar icra olunması üçün Bakı Ağır Cinayətlər Məhkəməsinə göndərilib.

Baş Prokurorluqda Hicran Allahverdiyevanın cinayət işi araşdırılandan sonra iş yenidən baxılması üçün Bakı Ağır Cinayətlər Məhkəməsinə göndərilib.


Müəllif: Hacı Zeynalov
Загрузка...